ހިނގަމުން މިދާ 19 ވަނަ މަޖިލީހުގެ އެންމެ ފަހު ޖަލްސާ މާދަމާއަށް ތާވަލުކޮށްފައިވާއިރު، މިއީ 2019 ވަނަ އަހަރުގެ މެއި މަހުގެ 28 ވަނަ ދުވަހު ހުވައި ކުރި މަޖިލީހެވެ.
ހިނގަމުން މިދާ މަޖިލީހުގެ ދައުރު ފެށީ ބޮޑު އަގްލަބިއްޔަތަކާ އެކު އޭރު ވެރިކަން ކުރި އެމްޑީޕީގެ ސުޕަ މެޖޯރިޓީ އާއެކު އެވެ.
މަޖިލީހުގެ މި ދައުރުގެ ފުރަތަމަ ރައީސްއަކީ ރައީސް މުހައްމަދު ނަޝީދު އެވެ. އަދި ނާއިބު ރައީސްއަކީ އީވާ އަބްދުﷲ އެވެ. އެހެންނަމަވެސް ސިޔާސީ ހިޔާލު ތަފާތުވުންތަކާއި ކޯޅުންތަކަށް ފަހު ދެ ބޭފުޅުން ވެސް ރިޔާސަތުން އިސްތިއުފާ ދެއްވި އެވެ. މީގެ ތެރެއިން ރައީސް ނަޝީދު އަންނަ ދައުރަށް ކުރިމަތި ނުލައްވަން ނިންމެވިއިރު، އީވާއަށް އިންތިހާބުގައި ބޮޑު ނާކާމިޔާބީއަކާ ކުރިމަތިވި އެވެ.
ރައްޔިތުންގެ މަޖިލީހުގެ މިހާރުގެ ރައީސަކީ މުހައްމަދު އަސްލަމްއެވެ. އަދި މިހާރުގެ ނާއިބް ރައީސަކީ އަހްމަދު ސަލީމެވެ. އެދެ މެމްބަރުންނަށް ވެސް އަންނަ ދައުރުގެ މަޖިލީހުން ފުރުސަތެއް ލިބިވަޑައެއް ނުގެންނެވި އެވެ.
19 ވަނަ މަޖިލީހުގައި 87 މެމްބަރުން ތިއްބަވާއިރު، އިންތިހާބުވެ ވަޑައިގެންނެވި ދެ މެންބަރަކު އަވަހާރަވެފައިވެ އެވެ.
މި ދައުރު ނިމެނީ މިމަހުގެ 15 ގައެވެ. ނަމަވެސް ޖަލްސާތައް ކުރިއަށް ގެންދަން ހަމަޖެހިފައިވަނީ 13 ވަނަ ދުވަހާ ހަމައަށެވެ. އާ މަޖިލިސް ހުވާކުރުމަށް ނިންމާފައިވަނީ މިމަހުގެ 28 ވަނަ ދުވަހުއެވެ.
