މާބަނޑު އަންހެނަކަށް އާއިލާއިން އަނިޔާކުރި މައްސަލައެއް ފުލުހުން ބަލަން ފަށައިފިއެވެ.
އެ މައްސަލަ ފެންމަތިވެފައިވަނީ ސޯޝަލް މީޑިއާގައެވެ. އެގޮތުން ފޭސްބުކްގައި މީހަކު ހިއްސާކޮށްފައިވާ ޕޯސްޓެއްގައިވަނީ، އޭނާގެ ބައްޕަ އާއި 18 އަހަރު ނުވާ ކޮއްކޮއާއި އާއިލާގެ އިތުރު މީހުންގެ ފަރާތުން ވެސް އަނިޔާ ލިބޭ ކަމަށާއި އެމީހުން އޭނާގެ ބަނޑާއި ބޮލުގައި ޖަހާ ކަމަށެވެ.
އެ ޕޯސްޓުގައި އޭނާ ވަނީ ހަށިގަނޑުގެ އެކި ތަންތަނުން ޒަޚަމްތައް ފެންނަ ފޮޓޯތަކެއް ހިއްސާކޮށްފައެވެ.
އެ އަނިޔާއަށް އިންސާފު ހޯދައިދިނުމަށް ފޭސްބުކްގައި ކުރި ޕޯސްޓް އެކްސްގައި ޝެއާކޮށް، މީހަކު ވަނީ ފުލުހުންގެ ސަމާލުކަމަށް ގެނެސްފައެވެ.
މިކަމާއި ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށާއި އެ މައްސަލަ ގުޅުން ހުރި މުއައްސަސާތަކާއި ގުޅިގެން ތަހުޤީގު ކުރަމުން އަންނަ ކަމަށެވެ. ނަމަވެސް އިތުރު ތަފްސީލެއް ނުދެއްވަ އެވެ.
މިދިޔަ އަހަރު ފުލުހަށް ގެވެށި އަނިޔާގެ 219 މައްސަލައެއް ރިޕޯޓުކޮށްފައިވާއިރު، މިއަހަރުގެ މިހާތަނަށް 91 މައްސަލަ ރިޕޯޓުކޮށްފައިވެއެވެ.
