ގައުމުގެ ދެމިއޮތުމަށް އާއިލާތައް ބަދަހިވެ ހަރުދަނާވުން މުހިންމުކަމުގައި ރައީސް މުއިއްޒު ވިދާޅުވެއްޖެއެވެ. މިއަދު ފާހަގަ ކުރެވެމުންދާ ބައިނަލްއަގުވާމީ އާއިލާތަކުގެ ދުވަހުގެ މުނާސަބަތުގައި ރައީސް މުއިއްޒު ކުރެއްވި އެކްސް ޕޯސްޓުގައި ވިދާޅުވެފައިވަނީ ގައުމީ ލޯތްބާއި ގައުމީ ޚިދުމަތާއި، ގައުމު ސަލާމަތްކުރުމުގެ ވިސްނުން އުފެދެނީ އާއިލާތަކުގެ ތެރެއިން ކަމުގައެވެ.
އަދި ގައުމުގެ ދެމިއޮތުމަށް އާއިލާތައް ބަދަހިވެ ހަރުދަނާވުން މުހިންމުކަމުގައި ރައީސް މުއިއްޒު ވިދާޅުވިއެެވެ.
މިއަދަކީ ބައިނަލްއަގުވާމީ ގޮތުން ފާހަގަ ކުރެވެމުންދާ ބައިނަލްއަގުވާމީ އާއިލާތަކުގެ ދުވަހުގެ ދުވެހެވެ. މި ދުވަސް ފާހަގަ ކުރެވެނީ އިޖުތިމާއީ ގޮތުންނާއި، އިގްތިސާދީ ގޮތުންނާއި، އުމުރާއި، ނަސްލީ އަދި ވަކި ޖިންސަކަށް ނިސްބަތްވީތީ އާއިލާތަކަށް ކުރިމަތިވާ ގޮންޖެހުންތަކުން އަރައިގަތުމަށް އާއިލާތަކަށް އެހީތެރިކަން ފޯރުކޮށްދިނުމަށް ހިތްވަރު ދިނުމުގެ ގޮތުންނެވެ.
ޔޫއެން ޖެނެރަލް އެސްމެބްލީން ބައިނަލްއަގުވާމީ އާއިލީ ދުވަހެއް އެންމެ ފުރަތަމަ ކަނޑައެޅޫ 1993 ވަނަ އަހަރުއެވެ. އެއަށްފަހު 1994 ވަނަ އަހަރު ޔޫއެންއިންވަނީ، އާއިލާތަކަށް ކުރިމަތިވާ ގޮންޖެހުންތަކުން އަރައިގަތުމާއި، އެއްބައިވަންވުމާއި، އާއިލީ ގުޅުންތައް ބަދަހި ކުރުމުގެ މިހިންމުކަން ފާހަގަކަށް، އާއިލީ އެއްބައިވަންތަކަށް ޚާއްސަކޮށް ގަރާރެއް ފާސް ކޮށްފައެވެ.
