ޔޫތު މިނިސްޓަރު އަހުމަދު މަހުލޫފުގެ ކޮރަޕްޝަން މައްސަލައިގައި ދައުވާ ކޮށްދިނުމަށް ޕްރޮސެކިއުޓާ ޖެނެރަލް އޮފީހަށް ފޮނުވާފައިވަނިކޮށް، އެމައްސަލައިގައި ކަންތައްތަކެއް ފުރިހަމަ ކުރުމަށް އެންޓި ކޮރަޕްޝަން ކޮމިޝަން (އޭސީސީ) އަށް އަންގައިފި އެވެ.
މިމައްސަލަ އަނބުރާ ފޮނުވައި ނުލާކަމަށް ޕީޖީން ބުނެ އެވެ.
މަހުލޫފުގެ ކޮރަޕްޝަން މައްސަލައިގައި ކަންތައްތަކެއް ފުރިހަމަ ކުރުމަށް މިދިޔަ ފެބުރުއަރީ މަހުވެސް ޕީޖީން އޭސީސީއަށް އެންގި އެވެ. އެކަންކަން އަދިވެސް ފުރިހަމަ ކޮށްފައި ނުވާކަމަށް ޕީޖީން ބުނެ އެވެ. އަދި ފަހުން ދައުވާ ކުރަން އެދި ފޮނުވިއިރު ބައެއް ލިޔުންތައްވެސް އޭސީސީން ހިއްސާ ކޮށްފައި ނުވާކަމަށް ބުންޏެވެ. އަލުން އެކަންކަން ފުރިހަމަ ކުރުމަށް އޭސީސީއަށް ލިޔުމުން ވަނީ ދަންނަވައިފަ އވެވެ.
މަހުލޫފުގެ މައްޗަށް ދައުވާ ކުރަން ފޮނުވީ ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީ ބޮޑު ހިޔާނާތާއި ގުޅިގެން މަހުލޫފު ރިޝްވަތުގެ ފައިސާ ނެންގެވިކަން ތަހުގީގަށް ސާބިތުވެގެންނެވެ. އެގޮތުން ކުރީގެ ސަރުކާރުން ފާސްކުރި ސްޕެޝަލް އިކޮމިކް ޒޯން ބިލު މަޖިލީހުން ފާސް ކުރަން މަހުލޫފަށް 33،000 ޑޮލަރު ދިން ކަން ވަނީ ތަހުގީގަށް އެނގިފަ އެވެ. އޭރު މަހުލޫފު ހުންނެވީ ރައްޔިތުންގެ މަޖިލީހުގެ މެމްބަރެއްގެ ގޮތުގަ އެވެ.
މިމައްސަލައިގައި މަހުލޫފު ވިދާޅުވެފައިވަނީ އެސްއީޒެޑު ބިލަށް ވޯޓު ދެއްވީ އޭރު ޕީޕީއެމްއިން ނެރުނު ތްރީ ލައިން ވިޕާއި އެއްގޮތަށް ކަމަށެވެ. އަދި 33،000 ޑޮލަރަކީ ރިޝްވަތު ފައިސާ ނޫން ކަމަށާއި އެއީ ޑޮލަރުގެ މުއާމަލާތެއް ކުރުމަށް އޭނާގެ އެކައުންޓަށް ޖަމާކުރި ފައިސާކަމަށް ވިދާޅުވި އެވެ.
މަހުލޫފު ވިދާޅުވި ގޮތުގައި އެމްއެމްޕީއާރުސީ މައްސަލައާއި ގުޅިގެން ކަން ކުރަމުން ދަނީ ޒާތީ ވެގެންނެވެ. އަދި މަސައްކަތް ކުރަމުން ދަނީ އޭނާގެ ސިޔާސީ ހަޔާތް ކަތިލުމަށްކަމަށްވެސް މަހުލޫފު ތުހުމަތު ކުރައްވަ އެވެ.
https://hama.mv/articles/habaru/800
މަހުލޫފު މިފަދައިން ވިދާޅުވި ނަމަވެސް ޖަމާކުރި ފައިސާއަކީ ޑޮލަރުގެ މުއާމަލާތެއް ކުރުމަށް ޖަމާކުރި ފައިސާ ނޫންކަން އޭސީސީގެ ތަހުގީގަށް ވަނީ ސާބިތުވެފަ އެވެ. އެފައިސާ މަހުލޫފުގެ އެކައުންޓަށް ޖަމާކޮށްފައިވަނީ އެސްއޯއެފްގެ އެކައުންޓުންނެވެ. އެސްއޯއެފްއަކީ އެމްއެމްޕީއާރުސީ ހިޔާނާތުގައި އެންމެ ގިނަ ފައިސާގެ މުއާމަލާތްތައް ހިންގި ކުންފުންޏެވެ.
