މިއަހަރު ރާއްޖެއިން ހައްޖަށްދާ މީހުން ފުރުވާލުމުގެ އިންތިޒާމްތައް ފުރިހަމަކުރެވިފައިވާ ކަމަށާއި، ފުރަތަމަ ފްލައިޓް މި މަހުގެ 31ވާ ހުކުރު ދުވަހު ފުރާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި ޝަހީމް ވިދާޅުވީ، ހައްޖަށް މީހުން ގެންދިއުމުގެ އިންތިޒާމްތައް ހަމަޖެއްސުމުގައި މަސައްކަތްކުރާ އިސްފަރާތްތަކާއި އިދާރާތަކާއި ބައްދަލުކުރައްވާ، މަޝްވަރާ ކުރައްވާފައިވާ ކަމަށެވެ.
ޝަހީމް ވިދާޅުވީ، ރާއްޖެއިން ހައްޖަށްދާ މީހުންގެ ފުރަތަމަ ފްލައިޓް މި މަހުގެ 31ވަނަ ދުވަހު ސައުދީ އަރަބިއާއަށް ދިއުމަށް ފުރާނެ ކަމަށެވެ. އަންނަ ހަފްތާގައި ހައްޖަށްދާ މީހުން ފުރަން ހަމަޖެހިފައިވާއިރު، ހައްޖުވެރިން ފުރުމުގެ އިންތިޒާމްތައް ފުރިހަމަ ކުރެވިފައިވާ ކަމަށް ޝަހީމް ވިދާޅުވިއެވެ.
އެގޮތުން، އެކަމަށް ކުރަންޖެހޭ ތައްޔާރީތައް މުއައްސަސާތަކާއި ގުޅިގެން ކޮށް، ތައްޔާރީތައް ނިމިފައިވާ ކަމަށް މިނިސްޓަރު ވިދާޅުވިއެވެ.
ހައްޖުގެ އަޅުކަމަށް ދާ މީހުންނަށް ބޭނުންވާ ހިދުމަތްތައް ހަރުދަނާކުރުމަށް، ރާއްޖެއަށް ލިބޭ 1،000 ކޯޓާ ސަރުކާރު ކުންފުނި، ހައްޖު ކޯޕަރޭޝަނަށް ދިނުމަށް ސަރުކާރުން ވަނީ ނިންމަވާފައެވެ.
