ނުގަވައިދުން މާލެ މަގުމައްޗަށް ފުރިޖެއް ނެރުނު ބިދޭސީ އަންހެނަކު ޖޫރިމަނާކޮށްފައިވާ ކަމަށް މާލެ ސިޓީ ކައުންސިލުން ބުނެފިއެވެ.
މާލޭ މަގުމައްޗަށް އެއްވެސް ހަމައެއް ނެތި، ގަވާއިދާ ޚިލާފަށް ކުނި ނެރޭ މައްސަލަ ވަނީ ވަރަށް ބޮޑުވެފައެވެ. މިގޮތުން، ނިމިދިޔަ ރޯދަމަހާ ދިމާކޮށް، މި މައްސަލަ ބޮޑުވެ، މާލޭގެ މަގުތައް ގޮނޑުވިއެވެ.
މި މައްސަލަ އަދި ވެސް ހައްލުނުވާއިރު، މިއަދު މާލޭ ސިޓީ ކައުންސިލުން އެކްސްގައި ކުރި ޕޯސްޓެއްގައި ބުނީ، އަނޯނާ ގޯޅިން މަގުމައްޗަށް ފުރިޖެއް ނެރުނު ބިދޭސީއަކު ޖޫރިމަނާކޮށްފައިވާ ކަމަށެވެ.
އެ މައްސަލައިގައި، މަގުމައްޗަށް ނެރުނު ފުރިޖު އެ ބިދޭސީ މީހާ ލައްވާ އެތަނުން ނަގުވާ މަންޒަރު ފެންނަ ވީޑިއޯއެއް ސިޓީ ކައުންސިލުން ވަނީ އާންމުކޮށްފައެވެ.
މީގެކުރިން އެ ކައުންސިލުން ބުނީ، މަގަށް ކުނި އަޅާ މީހުން ޖޫރިމަނާ ކުރަނީ 500 ރުފިޔާއިން ކަމަށާއި އެކަން ތަކުރާރު ވިޔަސް އެ އަދަދަށްވުރެ އިތުރަށް ޖޫރިމަނާ ކުރަން ގާނޫނުގައި ބުނެފައިނުވާ ކަމަށެވެ.
