މާލޭގައި ހިނގި މާރާމާރީއަކާއި ގުޅިގެން ދެ މީހަކު ހައްޔަރުކޮށްފިއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި މާރާމާރީ ހިނގީ ރޭގަނޑުގެ ވަގުތެއްގައެވެ.
އެ ވީޑިއޯއިން ފެނިގެން ދަނީ ސައިކަލުގައި އައި ތިން މީހަކު އެކަކު އަނެކަކު ގައިގައި ތަޅާ އަނިޔާކޮށް، ހަޑި ހުތުރު ބަހުން ވާހަކަ ދައްކާ މަންޒެރެވެ. އެ މީހުން ހުއްޓުވަން އެކަކު މަސައްކަތް ކުރާ މަންޒަރު ފެނިގެންދާއިރު،ސައިކަލުގައި މަޑުކޮށްގެން ބައެއް މީހުން އެ މަންޒަރު ބަލަން ތިބި މަންޒަރު ވެސް ފެނެއެވެ.
މޯލްޑިވްސް ޕޮލިސް ސާވިސްގެ ސްޕޯކްސްޕާސަން ސުޕްރިންޓެންޑެންޓް އޮފް ޕޮލިސް އަހުމަދު ޝިފާން މިއަދު ވިދާޅުވީ އެ މާރާމާރީ ތަޙްގީގު ކުރުމަށް، މިކަމުގައި ޝާމިލްވިކަމަށް ތުހުމަތުކުރެވޭ ދެމީހުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ހައްޔަރުކުރި މީހުންގެ މަޢުލޫމާތެއް ހިއްސާކޮށްފައެއް ނުވެއެވެ. މިކަމުގައި ބައިވެރިވާ އެހެނިހެން ފަރާތްތައް ހޯދުމުގެ މަސައްކަތް ކުރަމުންދާ ކަމަށް ޝިފާން ވިދާޅުވިއެވެ.
