ރައީސް އިބްރާހިމް މުހައްމަދު ޞާލިހުގެ ސަރުކާރުން އުފެއްދި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަ ބަލާ ރިޔާސީ ކޮމިޝަންގެ މަސައްކަތްތައް ނިމި ރިޕޯޓު ހަވާލު ކުރުމުން އެ ރިޕޯޓު އާންމު ކުރާނެ ކަމަށް ރައީސުލްޖުމްހޫރިއްޔާގެ އޮފީހުން ބުނެފި އެވެ.
ރައީސް ޞާލިހުގެ ވެރިކަން ނިމުނުއިރު މަރު ކޮމިޝަންގެ މަސައްކަތްތައް ނުނިމެ އެވެ.
މި މަހުގެ 31ވަނަ ދުވަހު ކޮމިޝަން އުވާލަން ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ.
އެހެންވެ، ބައިނަލްއަގުވާމީ ބައެއް ޖަމިއްޔާތަކުން ވެސް ވަނީ މި ކޮމިޝަންގެ ހޯދުންތައް ހާމަކުރަން ގޮވަލާފައެވެ.
މީޑިއާތަކަށް މައުލޫމާތު ދެއްވަމުން ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު މިއަދު ވިދާޅުވީ ކޮމިޝަންގެ ރިޕޯޓް ރައީސް އޮފީހަށް ލިބުނުހާ އަވަހަކަށް އެ މައުލޫމާތު އާންމުކުރާނެ ކަމަށެވެ.
މަރު ކޮމިޝަންގެ މަސައްކަތްތައް 5 އަހަރު ވީއިރުވެސް ނިމިފައި ނުވާއިރު ދައުލަތުގެ ބަޖެޓުން އެތައް މިލިއަން ރުފިޔާއެއް މި ކޮމިޝަންގެ މެމްބަރުންނަށް ވަނީ ހަރަދުކޮށްފަ އެވެ.
