ޕީއެންސީގެ ޓިކެޓްގައި ރައްޔިތުންގެ މަޖިލީހަށް އިންތިހާބުވި ބޭފުޅުންނާ، ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްދަލުކުރެއްވުމަށް ނިންމަވައިފި އެވެ.
20 ވަނަ ރައްޔިތުންގެ މަޖިލިސް ހުވާ ކުރަން ނިންމާފައިވަނީ މިމަހުގެ 28 ވަނަ ދުވަހުއެވެ.
ޕީއެންސީގެ ޓިކެޓުގައި މަޖިލިސް އިންތިޚާބު ކާމިޔާބު ކުރެއްވި ބައެއް ބޭފުޅުން ވަނީ މިއަދު 3:45 އަށް ރައީސް އެބޭފުޅުންނަށް ދައުވަތު ދެއްވާފައިވާކަމަށް ވިދާޅުވެފަ އެވެ.
އެނގިފައިވާގޮތުގައި 20 ވަނަ ރައްޔިތުންގެ މަޖިލީހުގެ ރައީސް އާއި ނައިބް ރައީސް އަދި ޕީއެންސީގެ ޕީޖީ ގުރޫޕްގެ އިސް މަގާމުތަކަށް ހޮވާނެ ބޭފުޅުންނާ ގުޅޭގޮތުން މިބައްދަލުކުރެއްވުމުގައި ރައީސް އެބޭފުޅުންނާއި މަޝްވަރާ ކުރައްވާނެ އެވެ.
މިދިޔަ އޭޕްރީލް 21 ވަނަ ދުވަހު ބޭއްވި ރައްޔިތުންގެ މަޖިލިސް އިންތިހާބުގައި 93 ދާއިރާއަށް މެންބަރުން ހޮވިއިރު ޕީއެންސީގެ ޓިކެޓްގައި ވާދަކުރައްވައިގެން 66 ބޭފުޅަކު ގޮނޑި ކާމިޔާބު ކުރެއްވި އެވެ. އަމިއްލަ ގޮތުން އިންތިހާބުގައި ވާދަކުރެއްވި ބޭފުޅުންގެ ތެރެއިން 11 ބޭފުޅުން ގޮނޑި ކާމިޔާބު ކުރެއްވިއިރު އަށް ބޭފުޅަކު ޕީއެންސީއަށް ވަނީ ސޮއި ކުރައްވާފަ އެވެ. އެހެންކަމުން ކުރިއަށް އޮތް މަޖިލީހުގައި ޕީއެންސީ ތަމްސީލް ކުރައްވާނެ މެންބަރުންގެ އަދަދު މިހާރު ވަނީ 74 އަކަށް އިތުރުވެފަ އެވެ.
