މި ސަރުކާރުން ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް ތަރައްގީ ކުރުމަށް ބޭނުންވާ ފީސިބިލިޓީ ސްޓަޑީ ހެދުމަށް މިއަދު ޗައިނާ ސަރުކާރާ ހަވާލުކޮށްފިއެވެ.
ކޮންސްޓްރަކްޝަން މިނިސްޓްރީއާއި ޗައިނާގެ އެމްބަސީއާ ދެމެދު ސޮއި ކުރެވުނު މި އެއްބަސްވުމާއެކު ވިލިމާލޭގައި 100 އެނދުގެ ހޮސްޕިޓަލެއް އެޅުމަށް ހަދަން ޖެހޭ ފީސިބިލިޓީ ސްޓަޑީ ހެދުމުގެ މަސައްކަތް ފެށިގެން ދާނެ އެވެ.
މި އެއްބަސްވުމުގައި ސޮއި ކޮށްފައިވަނީ ދަރުމަވަންތަ ހޮސްޕިޓަލުގައި ކުރިއަށް ގެންދިޔަ ރަސްމިއްޔާތެއްގަ އެވެ. ރާއްޖޭގެ ފަރާތުން މި އެއްބަސްވުމުގައި ސޮއި ކުރައްވާފައިވަނީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެވެ. ޗައިނާގެ ފަރާތުން މި އެއްބަސްވުމުގައި ސޮއި ކުރެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލިޒިން އެވެ.
ރާއްޖޭގެ ސިއްހީ ދާއިރާ ތަރައްގީ ކުރުމަށް ދާދި ފަހުން ސައުދީ ފަންޑުން ވަނީ 50 މިލިއަން ޑޮލަރުގެ ލޯން އެހީއެއްވެސް ފޯރުކޮށްދީފަ އެވެ. މި ލޯނާއެކު ރާއްޖޭގައި 150 އެނދުގެ ތިން ހޮސްޕިޓަލެއް ތަރައްގީ ކުރުމަށް ވަނީ ނިންމާފަ އެވެ. މި ލޯނުގެ ސަބަބުން ރަށްރަށުގައި ދިރިއުޅޭ މީހުންނަށް ރަނގަޅު ސިއްހީ ފަރުވާއެއް ލިބޭނެކަމަށް އުންމީދު ކުރައްވާކަމަށް ސައުދީ ފަންޑުގެ ސީއީއޯ ސުލްތާން އަބްދުއްރަހްމާން އަލް މަރުޝަދު ވަނީ ވިދާޅުވެފަ އެވެ.
