ޓެކްސް ކޮމިޝަނަރުގެ މަގާމާ ހަވާލުވުމަށް ބޭންކް އޮފް މޯލްޑިވްސް (ބީއެމްއެލް) ގެ ޑިރެކްޓަރުންގެ ބޯޑުގެ ޗެއާޕާސަން ހަސަން ޒަރީރު އިސްތިއުފާދެއްވައިފި އެވެ.
ބީއެމްއެލްއިން ބުނީ އެ ބޭންކުގެ ޗެއާޕާސަން ޒަރީރު އިސްތިއުފާ ދެއްވާފައިވަނީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ޒަރީރު އައްޔަން ކުރުމަށް ރައްޔިތުންގެ މަޖިލީހުން ރުހުން ދިނުމާ ގުޅިގެން ކަމަށެވެ.
ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރުމަށް ޒަރީރަށް މަޖިލީހުން ރުހުން ދީފައިވަނީ މި މަހު 14 ވަނަ ދުވަހުއެވެ.
ޓެކްސް ކޮމިޝަނަރުގެ މަގާމު ހުސްވެފައިވަނީ އެ މަގާމުގައި ކުރިން ހުންނެވި ފަތުހުﷲ ޖަމީލް، މަޖިލިސް އިންތިހާބުގައި ވާދަ ކުރެއްވުމަށް އެ މަގާމުން އިސްތިއުފާ ދެއްވުމާ ގުޅިގެންނެވެ.
ބޭންކުގެ ހިންގާ ގަވައިދުގައިވާ ގޮތުން ބޭންކުގެ ބޯޑު އެކުލެވިގެން ވަނީ ސަރުކާރުން އައްޔަންކުރާ އަށް މެންބަރުންނާއި އާންމު ހިއްސާދާރުންގެ ފަރާތުން ހޮވާ ތިން މެންބަރުންނާ އެކު ޖުމްލަ 11 މެންބަރުންގެ މައްޗަށެވެ.
ޒަމީރު އިސްތިއުފާ ދެއްވުމުން، ބޭންކުގެ ބޯޑުގައި ތިއްބެވީ ޖުމްލަ ނުވަ ޑައިރެކްޓަރުން ކަމަށެވެ. އެއީ ސަރުކާރުން އައްޔަން ކުރައްވާ ދެ މެންބަރުންގެ މަގާމު ހުސްވުމާ ގުޅިގެންނެވެ.
ޒަރީރު ބީއެމްއެލްގެ ޑިރެކްޓަރުންގެ ބޯޑުގެ ޗެއާރޕާސަންގެ މަގާމަށް އައްޔަން ކޮށްފައިވަނީ މި އަަހަރުގެ މާރޗް މަހުގެ 25 ވަނަ ދުވަހުއެވެ.
