ޗައިނާއިން ރާއްޖެއަށް 1،500 ޓަނުގެ ފެން ހަދިޔާ ކޮށްފި އެވެ.
ފޮރިން މިނިސްޓްރީން ބުނީ ޗައިނާގެ ޝީޒަންގް އޮޓޮނޮމަސް ރީޖަން (Xizang Autonomous Region) ގެ ޗެއާމަން 2023 ނޮވެމްބަރުގައި ރާއްޖެއަށް ކުރެއްވި ރަސްމީ ދަތުރުފުޅުގައި 1،500 ޓަނުގެ ބޯފެން ރާއްޖެއަށް ހަދިޔާކުރައްވަން ގަސްދުކުރައްވާކަން ހާމަކުރައްވާފައިވާ ކަމަށެވެ. އެގޮތުން، އެފަރާތުން ހިލޭ ހަދިޔާކުރައްވާ ފެނުގެ ޝިޕްމަންޓް މިހާރު ވަނީ ރާއްޖެ އައިސްފައި ކަމަށް ފޮރިން މިނިސްޓްރީން ބުންޏެވެ.
ދިވެހި ސަރުކާރުން ނިންމަވާފައިވަނީ މިފެން ބޭނުންކުރާނީ ރާއްޖޭގެ ރަށްރަށަށް ފެނުގެ ދަތިކަން ދިމާވާ ހާލަތްތަކުގައި އެރަށްރަށަށް އެހީގެ ގޮތުގައި ފޯރުކޮށްދިނުމަށެވެ.
މިއަދު ފޮރިން މިނިސްޓްރީގައި ބޭއްވި ރަސްމިއްޔާތެއްގައި ރާއްޖޭގެ ފަރާތުން އެ ހަދިޔާ ބަލައިގަތީ މިނިސްޓަރު އޮފް ފޮރިން އެފެއާޒް މޫސާ ޒަމީރެވެ. ޗައިނާގެ ފަރާތުން މި ހަދިޔާ ހަވާލުކޮށްދެއްވީ ރާއްޖޭގައި ހުންނަވާ ޗައިނާގެ ސަފީރު ހާ އެކްސެލެންސީ ވަން ލިޒިން އެވެ.
މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ފޮރިން މިނިސްޓަރު މޫސާ ޒަމީރު ވަނީ ރާއްޖެ އާއި ޗައިނާއާ ދެމެދު އޮންނަ ހާރިޖީ ގުޅުމަށް އަލިއަޅުވާލައްވައި، ޗައިނާއަކީ ރާއްޖޭގެ ރަނގަޅު ރަހުމަތްތެރިއެއްގެ ގޮތުގައި، ހާއްސަކޮށް ރާއްޖެއަށް ދިމާވާ ގޮންޖެހުންތަކުގައި އެހީތެރިވާ ގައުމެއްކަން ފާހަގަކުރައްވާފަ އެވެ.
މިނިސްޓަރު ޒަމީރު ވަނީ ޒިޖަންގް އޮޓޮނޮމިކް ރީޖަންގެ ޗެއާމަންއަށް މި ފުރުސަތުގައި ޝުކުރު އަދާކުރައްވާފަ އެވެ.
