ވަގު ޓެލެގްރަފިކް ޓްރާންސްފާ (ޓީޓީ) ބޭނުންކޮށްގެން ރާއްޖެ އަށް މުދާ އެތެރެކުރުމުގެ ތުހުމަތަށް ހައްޔަރުކުރި މަކަރާއި ހީލަތުގެ މައްސަލަތަކުގެ ރިކޯޑް އޮތް ހުސައިން ޝިފާއު ޕޮލިޓިކަލް ޑައިރެކްޓަރުގެ މަގާމަށް އައްޔަންކުރިތާ 4 ދުވަސްފަހުން އޭނާ މަގާމުން ވަކިކޮށްފިއެވެ.
އޭނާ މި ސަރުކާރުގައި އައްޔަންކުރީ އެނިމަލް ވެލްފެއާ މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމަށެވެ. އޭނާއަށް ޕޮލިޓިކަލް ޑައިރެކްޓަރުގެ މަގާމް ހަމަޖެއްސުމާއެކު މީޑިއާތަކުގައިވަނީ ސަރުކާރަށް ވަަރަށް ބޮޑަށް ފާޑުކިއުން އަމާޒުވެފައެވެ.
ބައެއް މީޑިއާތަކަށް މައުލޫމާތު ދެއްވަމުން ސަރުކާރުގެ ތަރުޖަމާން ހީނާ ވަލީދު ވިދާޅުވީ އޭނާއަށް މަގާމް ދެވިފައިވަނީ އޭނާގެ މައްޗަށް ތުހުމަތުކުރާ ކަންކަމުގެ މައުލޫމާތުތައް ކުރިން ނުލިބި ހުރުމުން ކަމުގައެވެ. އަދި ހީނާ ވިދާޅުވީ އޭނާ މަގާމުން ވަކިކޮށްފައިވަނީ އޭނާގެ މައްޗަށް ކޮށްފައިވާ ދައުވާގެ ތަފްސީލު ލިބުމާއެކު ކަމަށެވެ.
ސިޔާސީ މަގާމްތަކަށް އައްޔަންކުރާ ފަރާތްތަކުގެ ބެކްގްރައުންޑް މައުލޫމާތު ރައީސް އޮފީހުން ބަލަމުން އައިނަމަވެސް، ޝިފާއު މަގާމަށް އައްޔަން ކުރުމުގައި ކަން ދިމާވި ގޮތުން، ސިޔާސީ މަގާމްތަކަށް އައްޔަންކުރާ ފަރާތްތަކުގެ މައުލޫމާތު އިތުރު ސަމާލުކަމެއް ދީގެން ބެލުމަށް ހަމަޖައްސާފައިވާކަމަށްވެސް ހީނާ ވިދާޅުވެފައި ވެއެވެ.
ހުސައިން ޝިފާއު، ފޭކް ޓީޓީ ދައްކައިގެން ރާއްޖެ އެތެރެކޮށް ވިޔަފާރިކުރަމުން ދިޔައީ މޭވާ އާއި ތަކުރާރީއެވެ. އެ މައްސަލާގައި ހިމެނޭ ފައިސާގެ ޖުމުލަ އަދަދު 123،844.54 އެމެރިކާ ޑޮލަރަކަށް އަރަ އެވެ. އެއީ 1،909،682ރ. އެވެ. އެ ފައިސާ ދައުލަތަށް ނެގުމަށް ޕީޖީ އޮފީހުން ކޯޓަށް ހުށަހެޅި މައްސަލާގައި އެދިފައިވެއެވެ. ޝިފާއުގެ މައްޗަށް އުފުލާފައިވާ ދައުވާތައް ސާބިތުވެއްޖެ ނަމަ މަދުވެގެން 38 އަހަރުގެ ޖަލު ހުކުމެއް އަންނާނެއެވެ.
