ތޫނު އެއްޗަކުން ދިވެއްސަކަށް ހަމަލާދިން ބިދޭސީ މީހާގެ ބަންދަށް 15 ދުވަސް

ފުލުހުން މީޑިއާތަކަށް މައުލޫމާތު ދިންގޮތުން އިއްޔެ ހަވީރު ބިދޭސީއަކު ތޫނު އެއްޗަކުން ދިވެއްސަކަށް ހަމަލާ ދިނީ ލަންސިމޫ މަގުގައެވެ.

ފުލުހުން ބުނީ އެ މައްސަލައިގައި ހައްޔަކުރި މީހާ މިއަދު ހުޅުމާލެ މެޖިސްޓްރޭޓް ކޯޓަށް ހާޒިރުކުރި ކަމަށާއި އޭނާގެ ބަންދުގެ މުއްދަތު ޖަހައިފައިވާ ކަމަށެވެ.

ފުލުހުން އިއްޔެ ބުނީ އެ ހާދިސާގައި އަނިޔާވި މީހާއަށް ފަރުވާ ދޭން ގެންދިޔައީ ހުޅުމާލެ ހޮސްޕިޓަލަށް ކަމަށާއި އަނިޔާވީ އޭނާގެ އަތަށް ކަމަށެވެ. ނަމަވެސް އޭނާއަށް ސީރިއަސް އަނިޔާއެއް ނުވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށް ވެސް ފުލުހުން ބުނެފައިވެއެވެ.

ފުލުހުން އަންނަނީ މި މައްސަލަ ތަހުގީގު ކުރަމުންނެވެ.