މާލެ ސިޓީ ކައުންސިލްގެ ޑެޕިއުޓީ މޭޔަރުކަމަށް ޕީޕީއެމްގެ ފަރާތުން ވާދަކުރައްވާނެ ކައުންސިލަރަކު ކަނޑައެޅުމަށް ވޯޓު ނެގުން މިއަދު މެންދުރުފަހު 1 ޖަހާއިރަށް ތާވަލުކޮށްފި އެވެ.
ޕީޕީއެމްއިން ބުނީ އެކަމަށްޓަކައި މިއަދު ބާއްވާ ބައްދަލުވުމުގައި މެމްބަރަކު ހޮވާނީ ނަގާ ސިއްރު ވޯޓަކުން ކަމަށެވެ. ވޯޓުގައި މެމްބަރަކު ކަނޑައަޅާނީ ސިޓީ ކައުންސިލަށް އިންތިހާބުވި ހުރިހާ މެމްބަރުންގެ ބައިވެރިވުމާއިއެކު އެވެ.
ޑެޕިއުޓީ މޭޔަރަކު ކަނޑައެޅުމުގައި ޕީޕީއެމް ކައުންސިލަރުންގެ ތެރެއިން ހަތަރު ބޭފުޅަކު ވަނީ ޝައުގުވެރިކަން ފާޅު ކުރައްވައިފަ އެވެ. އެއީ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު އާއި މާފަންނު މެދު ދާއިރާގެ ކައުންސިލަރު އަހްމަދު ނަރީޝް އާއި ވިލިމާލެ ދާއިރާގެ ކައުންސިލަރު ނަހުލާ އަލީގެ އިތުރުން މާފަންނު ދެކުނު ދާއިރާގެ ކައުންސިލަރު އަބްދުﷲ ނާސިރެވެ.
އުފެދިފައިވާ ވާދަވެރިކަމުގެ ސަބަބުން ޑެޕިއުޓީ މޭޔަރަކު ހޮވުން މީގެ ކުރިން ފަސްކުރީ ކައުންސިލްގެ ހުރިހާ މެމްބަރުން ބައިވެރިވެވަޑައިގަންނަވާ ބައްދަލުވުމެއްގައި ވޯޓެއް ނެގުމަށެވެ. ޕީޕީއެމްގެ 11 މެމްބަރަކު މާލެ ސިޓީ ކައުންސިލް ތަމްސީލު ކުރައްވާއިރު ދާދި ފަހުން ވަނީ ޖޭޕީގެ ޓިކެޓުގައި ކައުންސިލަށް ހޮވިވަޑައިގެންނެވި ކައުންސިލަރަކު ޕީޕީއެމްއަށް ސޮއިކޮށްފަ އެވެ. އެހެންކަމުން މުޅި ޖުމްލަ މާލެ ސިޓީ ކައުންސިލްގައި ޕީޕީއެމްއަށް ނިސްބަތްވެވަޑައިގަންނަވާ 12 މެމްބަރުން މިހާރު ތިއްބަވަ އެވެ.
