މި އަހަރުގެ މިނިވަން ދުވަހުގެ ޝިއާރަކީ "ދިވެހީންގެ އަމިއްލަވަންތަކަން, ދިވެހީންގެ މިނިވަންކަން" ކަމުގައި ރައީސް ޑރ. މުހައްމަދު މުއިއްޒު ކަނޑައަޅުއްވައިފިއެވެ.
ރައީސް ޑރ. މުއިއްޒު ސަރުކާރުން ވަރަށް ބޮޑު އިސްކަމެއް ދެއްވައިގެން ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ޒިންމާތަކުގެ ތެރެއިން ކުރިއަށް ގެންދާ ދިވެހި ގައުމިއްޔަތުގެ ހާއްސަ މަޝްރޫއުގެ މުހިންމު އެއް ބަޔަކީ "އަމިއްލަވަންތަކަމެވެ". މިއަހަރުގެ މިނިވަން ދުވަހުގެ ޝިޢާރު ގުޅިފައި ވަނީ ގައުމިއްޔަތުގެ އެ މުހިންމު ސިފައާއެވެ.
މި އަހަރުގެ ޖުލައި 26 ވަނަ ދުވަހު، މިނިވަން ދުވަސް ފާހަގަ ކުރާ އިރު، ސަރުކާރުން ނިންމާފައި އޮތީ ހަފްތާއަކަށް ދެމިގެންދާ ގޮތަށް މި ދުވަސް ފާހަގަ ކުރުމަށެވެ. އަދި އެ ދުވަސް ފާހަގަ ކުރުމުގެ ގޮތުން ގިނަ ހަރަކާތްތަކެއް ކުރިއަށް ގެންދިއުމަށް ވަނީ ނިންމަވައިފައެވެ.
އެގޮތުން ދިދަ ނެގުމާއި ދުވަހުގެ ޖަލްސާ އާއި ރައީސް ދެކަނބަލުން ބާއްވަވާ ރަސްމީ ބައްދަލުކޮށްލެއްވުމާއި ހެވިކަމާއި ކުޅިވަރު, ފުޅަނދުބުރު, ކާނިވާ, މިނިވަން ދުވަހުގެ ހާއްސަ ދުވުން, ސާގާފީ ޝޯ އާއި ކާބޯތަކެތީގެ މައުރަޒު, ކުޑަކުދީންގެ ހަވީރު, ފިޔަވަތީގައި ތިބޭ ކުދީންނަށް ހާއްސަ ހަވީރު, އިސްރަށްވެހީންގެ ބައްދަލުވުން އަދި ސްޓޭޖް ޝޯތައް ބާއްވާނެއެވެ. އަދި މިނިވަން ދުވަހުގެ އުފަލުގައި ހަވާ އެރުވުމަށް ވެސް ވަނީ ހަމަޖެހިފައެވެ.
ރާއްޖެ އަށް މިނިވަންކަން ލިބިފައި ވަނީ 26 ޖުލައި 1965 ގައެވެ.
