ޚާއްސަ ހުއްދައެއްގެ ދަށުން ރާއްޖެ އެތެރެކުރި ކުއްތާއެއް، އެ ހުއްދައާއި ޚިލާފަށް ރާއްޖޭގެ ރަަށެއްގައި ގެންގުޅެފައިވާ ކަމަށް ބެލެވޭތީ އެ މައްސަލަ ތަހުގީގު ކުރަމުންދާކަމަށް މޯލްޑިވްސް ކަސްޓަމްސް ސަރވިސް އިން ބުނެފި އެވެ.
ރާއްޖޭގެ ރަށެއްގައި ކުއްތާއެއް ގެންގުޅެނިކޮށް ސޯޝަލް މީޑިއާގައި ދައުރުވަމުންދާ ވީޑިއޯތަކާއި ގުޅޭގޮތުން ކަސްޓަމްސްއިން މިއަދު ނެރުނު ބަޔާނެއްގައި ބުނެފައިވަނީ، އެ ކުއްތާއަކީ ދިވެހި ރާއްޖެއަށް ގެނައުން މަނާތަކެތީގެ ގާނޫނުގެ 5 ވަނަ މާއްދާގެ ހ ގެ ދަށުން މިނިސްޓްރީ އޮފް ޑިފެންސްގެ ޚާއްސަ ހުއްދައެއް ލިޔުމަކުން ލިބިގެން ރާއްޖެއަށް ގެނައި އެއްޗެއް ކަމަށެވެ. އެގޮތުން، ދައުރުވަމުންދާ ވީޑިއޯގައި ފެންނަ ކުއްތާ އަކީ، މި ހިނގާ މެއިމަހުގެ 16 ވަނަ ދުވަހު ހުއްދައާއެކު ސެއިލިންގ ޔޮޓެއްގައި ރާއްޖެ ގެނެސްފައިވާ ކުއްތާއެއް ކަމަށް ބުނެފައި ވެއެވެ.
ކަސްޓަމްސްއިން ބުނީ، ޑިފެންސްއިން ހުއްދަދިނީ ހަމައެކަނި އެ ޔޮޓްގައި “ޕެޓް ޑޯގް” އެއްގެ ގޮތުގައި އެ ކުއްތާއަށް ގެންގުޅުމަށް ކަމަށެވެ. އަދި އެ ޔޮޓު ރާއްޖޭގެ އެކި ސަރަަހައްދުތަކަށް ދަތުރުކުރި ނަމަވެސް، ޔޮޓުން ކުއްތާ ނުބޭލޭނެކަމަށް އެ ހުއްދައިގައި ބަޔާންކޮށްފައިވީ ނަމަވެސް، ހުއްދައާއި ޚިލާފަށް ކުއްތާ ޔޮޓުން ބާލައިގެން ރާއްޖޭގެ ރަށެއްގައި ގެންގުޅެފައިވާކަމަށް، ބެލެވޭތީ ކަސްޓަމްސްއިން އެ މައްސަލަ އިތުރަށް ތަހުގީގުކުރަމުންދާކަމަށް ކަސްޓަމްސްގެ ބަޔާނުގައި ވެއެވެ.
މި މައްސަލައިގައި އިއްޔެ ފުލުހުން ބުނެފައިވަނީ، ހިންމަފުށީގެ ބޭރުގައި އޮތް ޔޮޓެއްގައި ފަތުރުވެރިއަކު ގެންގުޅުނު ކުއްތާއެއް ތުލުސްދޫއަށް ބޭލިކަމުގެ ރިޕޯޓް ލިބުމާއި ގުޅިގެން ފުލުހުން ގޮސް އެ ކުއްތާ އަނބުރާ ޔޮޓަށް ގެންގޮސްފައިވާ ކަމަށެވެ.
