ފަރެސްމާތޮޑާ އެއާޕޯޓްގައި ޓޫރިސްޓް ހޮޓަލެއް އެޅުމަށް ހަވާލުކޮށްފި އެވެ.
މިއަދު އާރްއޭސީއެލްގެ އޮފީހުގައި ބޭއްވި ހާއްސަ ރަސްމިއްޔާތެއްގައި ފަރެސްމާތޮޑާ އެއާޕޯޓްގައި ޓޫރިސްޓް ހޮޓަލެއް ތަރައްގީ ކުރުމަށްޓަކައި އެ އެއާޕޯޓް ހިންގަމުންދާ ރީޖަނަލް އެއާޕޯޓްސް ކޮމްޕަނީ ލިމިޓެޑް (އާރްއޭސީއެލް) އާއި ސިލްވާ ލޭންޑް ހޮޓެލްސް އާ ދެމެދު އެއްބަސްވުމެއްގައި ސޮއިކޮށްފައި ވެއެވެ. އެ އެއްބަސްވުމުގައި ރީޖަނަލް އެއާޕޯޓްސްގެ ފަރާތުން ސޮއި ކުރެއްވީ ކުންފުނީގެ މެނޭޖިން ޑައިރެކްޓަރު އަހްމަދު މުބީން އެވެ. އަދި ސިލްވާ ލޭންޑް ހޮޓެލްސްގެ ފަރާތުން ސޮއި ކުރެއްވީ އެ ކުންފުނީގެ ޕްރޮޖެކުޓް މެނޭޖްމަންޓް ހެޑް އިބްރާހިމް މުހައްމަދެވެ.
މި އެއްބަސްވުމުގެ ދަށުން ފަރެސްމާތޮޑާ އެއާޕޯޓާއި އިންވެގެން އޮތް ހުސްބިމުގައި 100 ކޮޓަރި އެކުލެވޭގޮތަށް ސިޓީ ހޮޓަލްއެއް އެޅުމުން އެސަރަހައްދުގައި ދިރިއުޅެމުންދާ ރައްޔިތުންނަށް 200 އަށް ވުރެގިނަ ވަޒީފާގެ ފުރުސަތު ހުޅުވިގެން ދާނެ ކަމަށް އާރްއޭސީއެލް އިން ބުންޏެވެ. އަދި އެސަރަހައްދުގައި ވިޔަފާރި ކުރަން ބޭނުންވާ ފަހި ފުރުސަތު ތަކެއް ހުޅުވިގެންދާނެ ކަމަށްވެސް އާރްއޭސީއެލް އިން ބުންޏެވެ.
މި ރަސްމިއްޔާތުގައި ވާހަކަދައްކަވަމުން މުބީން ވިދާޅުވީ ސަރުކާރުގެ އެއްބާރުލުމާއިއެކު މި މަޝްރޫއުގެ މަސައްކަތް 3 މަސް ދުވަހުންވެސް ނިންމިދާނެ ަކަމަށެވެ. މި މަޝްރޫއުއަކީ ޖުމްލަ 20 މިލިއަން ޑޮލަރުގެ މަޝްރޫއުއެކެވެ.
