20 ވަނަ ރައްޔިތުންގެ މަޖިލީހުގެ މެންބަރުންނަކީ ރާއްޖޭގެ ބަރުލަމާނީ ހަޔާތުގައި އެންމެ ޒިންމާދާރު މަޖިލީހަށް ވާނެ ކަމަށް އުންމީދުކުރައްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެކްސްގައި ފޮނުއްވި މެސެޖެއްގައި ރައީސް މުއިއްޒު މިފަދައިން ވިދާޅުވީ އޭޕްރީލް 21 ގައި މަޖިލީހަށް އިންތިހާބުވެވަޑައިގަތް މަޖިލީސް މެންބަރުންގެ ހުވާކުރުމުގެ ރަސްމިއްޔާތު މިއަދު ބޭއްވުމާއި ގުޅިގެން ނެވެ. ރައީސް ފޮނުއްވި މަރުހަބާގެ މެސެޖްގައި ވަނީ 20 ވަނަ ރައްޔިތުންގެ މަޖިލީހުގެ މެންބަރުންނަށް ހިތުގެ އިހްލާސްތެރިކަމާއިއެކު މުބާރަކުބާދީ އަރުއްވާފަ އެވެ.
“އަޅުގަނޑުގެ އުންމީދަކީ ރާއްޖޭގެ ބަރުލަމާނީ ހަޔާތުގައި މިހާތަނަށް ދެކޭ އެންމެ ޒިންމާދާރު، އެންމެ އިތުބާރުހުރި، ގައުމާއި ރައްޔިތުންނަށް އެންމެ މަންފާހުރި ކަންކަން ނިންމާ މަޖިލީހަށް މިފަހަރުގެ މަޖިލީސް ވުން”
20 ވަނަ ރައްޔިތުންގެ މަޖިލީހަށް އިންތިޚާބުވެ ވަޑައިގެންނެވި މެންބަރުން ހުވާކުރަށްވާފައިވަނީ އެކަމަށްޓަކައި ރައްޔިތުންގެ މަޖިލީހުގެ އިދާރާގައި މިއަދު ބޭއްވި ހާއްސަ ޖަލްސާގަ އެވެ. ވިހި ވަނަ މަޖިލީހުގައި 93 މެންބަރުން ހިމެނިވަޑައިގަންނަވަ އެވެ.
