ބަޔަކަށް ޖިންސީ ގުނަވަން ދެއްކި ފިރިހެނަކު ހައްޔަރުކޮށްފި

އެ މައްސަލައިގައި ހައްޔަރުކޮށްފައިވަނީ ނ. ވެލިދޫ، މިރިހިމާގެ (މިހާރު ދިރިއުޅޭ އެޑްރެސް: ކ. މާލެ) ހާމިދު އަބްދުﷲ (39އ) އެވެ. ފުލުހުން އޭނާ ހައްޔަރުކޮށްފައިވަނީ އިއްޔެގެ ވަގުތެއްގައެވެ. އަދި މިއަދު ފުލުހުން ވަނީ އޭނާގެ ބަންދާ މެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކޮށްފައެވެ.

ފުލުހުން އޭނާ ކޯޓަށް ހާޒިރުކުރުމަށްފަހު ބުނީ، ބަސް ޓާމިނަލް ސަރަހައްދުގައި ހުރި ފިރިހެނަކު އެތަނުގައި ތިބި އަންހެނުންނަށާއި ކުޑަކުދިންނަށް އެ މީހާގެ ޖިންސީ ގުނަވަން ދައްކަމުންދާ ކަމުގެ ރިޕޯޓު ލިބިގެން ބަސް ޓާމިނަށް ފުލުހުން ގޮސްފައިވާނެ ކަމަށެވެ.

އާންމުން، ހާމިދު އަބްދުﷲ، ފުލުހުންނަށް ދެއްކުމުން، އޭނާ އިސްކަންދަރު މައިޒާން ތެރެއަށް ވަދެފައިވާ ކަމަށެވެ. އިސްކަންދަރު މައިޒާނުގެ ތެރެއަށް ފުލުހުން ވަން އިރު ހާމިދު އަބްދުﷲ ހުރީ އެތަނުގައި ހުރި ޓޭކް އަވޭ އެއްގެ ކައިރީގައި ކަމަށާއި ފުލުހުން އޭނާއާ ސުވާލުކުރުމުން، ހަމީދު އަބްދުﷲ ވަނީ ފުލުހުންނާ ހަޑިހުތުރު ބަހުން މުއާމަލާތްކޮށް މާރާމާރީ ހިންގައިފައި ކަމަށް ފުލުހުން ބުންޏެވެ.

"ފުލުހުން ގޮސް އެ މީހާ (ހާމިދު އަބްދުﷲ) ހުއްޓުވައި ސުވާލުކުރުމުން، މަޑުނުކޮށް ދާން އުޅުނު ކަމަށާއި މަޑުކުރަން އެންގުމުން މަޑުކުރަން ނުޖެހޭނެޔޭ ބުނެ ހަޑިހުތުރު ބަހުން އެއްޗެހި ކިޔަމުން ބޮޑުތަކުރުފާނު މަގުގެ ޓްރެފިކް ފްލޯއަށް ހުރަސް އެޅޭގޮތަށް މަގު މެދަށް ނުކުމެގެން ދާން ފެށުމުން، ދުއްވާ އެއްޗިއްސަށް ދަތިވާން ފެށުމުން ސީންގައި ހަރަކާތްތެރިވި ފުލުހެއް އެ މީހާގެ އަތުގައި ހިފާ އެއްކައިރު ކުރަން އުޅުމުން، ފުލުސް މީހާގެ މޫނުމަތީގައި ޖަހާ މާރާމާރީ ހިންގުމުން ފުލުސް މީހާގެ ނިތްކުރިމަތި ވާތް ފަޅި ދުޅަވެފައި ހުރި ކަމަށާއި އެވަގުތު އެތަނުގައި ހުރި އެހެން ފުލުސް މީހަކު އޭނާއާ ކައިރިވެ ފުލުހުންގެ ބެލުމުގެ ދަށަށް ގެންނަން އުޅުމުން، އެ ފުލުސް މީހާގެ ގައިގައި ޖެހުމުގެ ސަބަބުން އޭނާ އަޅުވައިގެން ހުރި ބޮޑީ ވޯން ކެމެރެ އާއި ޓޯކީ މަގުމައްޗަށް ވެއްޓުނު ކަމަށާއި، އަދި ފުލުސް މީހާ ލައިގެން ހުރި ޕޮލިސް ވިއްސާރަ ކޯޓުގެ ފަޓްލޫނު ވާތު ފައި ކަކޫ ކައިރިން ހަލާކުވެފައިވާ ކަމަށާއި، އަނެއްކާވެސް އޭނާ ކޮންޓްރޯލް ކުރުމަށް މަސައްކަތްކޮށް އޭނާ އެ ސަރަހައްދުގައި ބާއްވަން މަސައްކަތް ކުރަނިކޮށް އޭނާގެ ފައިން ފުލުސް މީހާގެ ގައިގާ ޖަހާ މާރާމާރީ ހިންގި" ފުލުހުން ބުންޏެވެ.

ހާމިދު އަބްދުﷲ، ފުލުހުންނާ މާރާމާރީ ހިންގުމުގެ ސަބަބުން އޭނާ ފުލުހުންގެ ބެލުމުގެ ދަށަށް ގެނެސްވިފައިވަނީ ޕެޕާ ސްޕްރޭ ބޭނުން ކޮށްގެން ފުލުހުން ބުންޏެވެ.

ފުލުހުންގެ ދެއްކި ވާހަކަތައް އަޑުއެހުމަށްފަހު ކޯޓުން ވަނީ ހާމިދު އަބުދުﷲ ގެ ބަންދަށް 15 ދުވަސް ޖަހައިފައެވެ. އޭނާގެ ބަންދަށް 15 ދުވަސް ޖެހީ އޭނާއަށް ތުހުމަތުކުރެވޭ ކުށް އޭނާ ކުރި ކަމަށް ކޮންމެވެސް ވަރަކަށް ފުލުހުން ހެކި ހުށަހަޅައިފާތީ އާއި ހާމިދު އަބުދުﷲ ބަންދުން ދޫކޮށްލައިފިނަމަ މުޖުތަމައުގެ ސަލާމަތައް ނުރައްކާ ވެދާނެތީއެވެ.

ކޯޓު އަމުރުގައިވާ ގޮތުން ހާމިދު އަބްދުﷲ ކުށުގެ ރިކޯޑު ގިނަ މީހެކެވެ.