އދ. ދަނގެތި ކައިރީގައި ފާނަ މަސްވެރިކަމަށް ގޮސް އުޅުނު ބިދޭސީއަކު ލޯންޗެއްގައި ޖެހި މަރުވެއްޖެއެވެ.
މިއަދު ހެނދުނު 07:30 ހާއިރު ހިނގި މި ހާދިސާގައި މަރުވެފައިވަނީ، ފ. ފީއަލީ ފާނާ މަސްވެރިކަންކުރާ “ޓްވިންސް” ދޯނީގައި, އިތުރު ބަޔަކާއި އެކު ފާނަ މަސްވެރިކަން ކުރަން މޫދަށް ފޭބި ބަންގްލަދޭޝްގެ މީހެކެވެ.
ދަނގެތި ކައިރީގައި ފާނަ މަސްވެރިކަން ކުރަން އުޅުނު, އެމީހާ ގައިގައި ޖެހުނީ މާމިގިލިން މާލެއަށް ދަތުރުކުރި ލޯންޗެކެވެ. އޭނާ ގައިމަތިން އެ ލޯންޗު ދުއްވުމުގެ ސަބަބުން އޭނާއަށް ބޮޑެތި ޒަޚަމްތަކެއް ލިބިފައިވާއިރު، އޭނާ ދަނގެތީ ސިއްހީ މަރުކަޒަށް ގެންދިޔައިރުވެސް މަރުވެފައިވާކަމަށް ފުލުހުން ބުނެއެވެ.
ފުލުހުން ބުނީ، ބިދޭސީ މީހާ ގައިމަތިން ދުއްވި ލޯންޗުގެ ކެޕްޓަން މިހާރު ހައްޔަރުކޮށްފައިވާކަމަށެވެ. އަދި، އެ ލޯޏްޗު ދުއްވަން އިނީ ދިވެހި ފިރިހެނެއް ކަމަށެވެ.
މިހާދިސާ މިހާރު ތަހުގީގު ކުރަމުން އަންނަކަމަށްވެސް ފުލުހުން ބުނެފައި ވެއެވެ.
