އިއްޔެގެ ވަގުތެއްގައި އައްޑޫސިޓިއަށް ލެއްގި ކޯމަހެއް، ރައްކާތެރިކަމާއި އެކީ ކަނޑަށް ދޫކޮށްލައިފިއެވެ.
އެނގިފައިވާ ގޮތުގައި މި ކޯމަސް ލައްގާފައިވަނީ އައްޑޫސިޓީގެ ނޭޗަރު ޕާކު ސަރަހައްދަށެވެ. އެ ކޯމަސް ރައްކާތެރިކަމާއި އެކީ ކަނޑަށް ދޫކޮށްލާފައިވާ ކަމަށް ނޭޗަރ ޕާކުން ވަނީ ބުނެފައެވެ.
އެގޮތުން ފޭސްބުކުގައި ކުރި ޕޯސްޓެއްގައި ނޭޗަރ ޕާކުން ބުނީ، އެސަރަހައްދުގެ ގޮނޑުދޮށަށް ކޯމަހެއް ލައްގާފައިވާ މައުލޫމާތު އިއްޔެ ހަވީރު 18:07 އެހާކަންހާއިރު ލބިފައިވާ ކަމަށާއި އެ މައުލޫމާތު ލިބުމާއި އެކީ ނޭޗަރ ޕާކުގެ މުވައްޒަފުންތައް އެސަރަހައްދަށް ދިޔަ ކަމަށެވެ.
މުވައްޒަފުންތައް އެސަރަހައްދަށް ގޮސް، ލޮނު ފެން އަބަދު ވެސް ކޯމަހަށް ލިބޭ ގޮތް ހެދި ކަމަށާއި އެތަކެއް މަސައްކަތުން، މުވައްޒަފުންގެ ފުރާނަ އަތްމައްޗަށް ލައިގެން، އެ ކޯމަސް ކަނޑަށް ދޫކުރެވިފައިވާ ކަމަށެވެ. ކޯމަސް ކަނޑަށް ދޫކުރެވިފައިވަނީ ރޭ 19:40 އެހާކަންހާއިރު ކަމަށް ވެސް ނޭޗަރު ޕާކުން ވަނީ ބުނެފައެވެ.
ނޭޗަރ ޕާކުން ބުނީ، ކޯމަސް ކަނޑަށް ދޫކުރި ނަމަވެސް، އެކި ސަބަބުތަކާއި ހުރެ ކޯމަސް އަލުން އެއްވެސް ސަރަހައްދަކަށް ލައްގާތޯ ބަލަމުން އަންނާނެ ކަމަށެވެ.
އައްޑޫ ނޭޗާ ޕާކުގެ ހަތަރު މުވައްޒަފުން ވެގެން ކުރި މި މަސައްކަތަށް ގިނަ ބަޔަކު އަންނަނީ ސޯޝަލް މީޑިއާގައި ތައުރީފް ކުރަމުންނެވެ.
