ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅިގެން، ސަރުކާރުގެ މެނިފެސްޓޯގައި ހިމެނޭ މުހިންމު ރިޔާސީ ވައުދެއްކަމުގައިވާ، ފަސް މިލިއަން ގަސްއިންދުމުގެ ޕްރޮގްރާމް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުޙައްމަދު، އިފުތިތާހުކޮށްދެއްވައިފި އެވެ.
މި ޕްރޮގްރާމް އިފުތިތާހުކުރުމަށް މިއަދު ހެނދުނު ލޮނުޒިޔާރަތް ޕާކުގައި ބޭއްވި ރަސްމިއްޔާތަށް ފަހު، އެ މަނިކުފާނު ވަނީ ޕްރޮގްރާމް އަމަލީގޮތުން ފެއްޓެވުމުގެ ގޮތުން ކާބޮލި އަރޮޅި ގަހެއް އިންދަވައިފަ އެވެ. މިއަދުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ ފަސް މިލިއަން ގަސް އިންދުމުގެ ޕްރޮގްރާމުގެ ލޯގޯވެސް އިފުތިތާހުކޮށްދެއްވާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ސަރުކާރުން ފަސް މިލިއަން ގަސް އިންދުމުގެ ޕްރޮގްރާމެއް ކުރިޔަށް ގެންދާނެކަން އިއުލާނުކުރެއްވީ މިދިޔަ އަހަރު ބޭއްވި ކޮޕް-28 ސަމިޓްގައެވެ. އެކި ފިޔަވަހިތަކަކަށް ބަހާލައިގެން ފަސް އަހަރުގެ ތެރޭގައި 5 މިލިއަން ގަސް އިންދަން ރާވާފައިވާއިރު، ރާއްޖޭގެ މީހުން ދިރިއުޅޭ ހުރިހައި ރަށްތަކާއި، ރިސޯޓްތަކުގައިވެސް މި ޕްރޮގްރާމް ކުރިޔަށް ގެންދިއުމަށް ވަނީ ހަމަޖެހިފަ އެވެ. އެގޮތުން، ފުރަތަމަ ފިޔަވަހީގައި އިންދާނީ ރާއްޖެއިން ނެތިގެން ހިގައިދާނެކަމުގެ ބިރު ހީވެފައިވާ ގަސްތަކާއި، ބޭސްވެރިކަމަށް ބޭނުން ހިފޭނެ ގަސްތަކާއި، މޭވާ އަޅާ ގަސްތަކުގެ އިތުރުން ހިޔާ ލިބޭ ގަސްތަކެވެ.
މި ޕްރޮގްރާމް ކުރިޔަށްްގެންދަނީ، ސިޓީ ކައުންސިލްތަކާއި، އަތޮޅު ކައުންސިލްތަކާއި މަދަނީ ޖަމްއިއްޔާ ޖަމާއަތްތަކާއި ގުޅިގެންނެވެ.
މި ޕްރޮގްރާމުން ދައްކުވައިދެނީ، ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމަށާއި، މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި، އަންނަން އޮތް ޖީލުތަކުގެ ލާބައާއި މަންފާއަށްޓަކައި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް ސަރުކާރުން ކުރަމުން ގެންދާ މަސައްކަތްތަކެވެ.
