މާލޭ ސިޓީގެ ޑެޕިއުޓީ މޭޔަރަކަށް ހޮވުން މާދަމާ މެންދުރު 1:00 އަށް ތާވަލު ކޮށްފި އެވެ.
މާލޭ ސިޓީ ޑެޕިއުޓީ މޭޔަރަކަށް ހޮވުމަށް ތާއީދު ކުރާނެ ފަރާތެއް ހޯދުމަށް ޕީޕީއެމުގެ އެތެރޭގައި މިއަދު ބޭއްވި އިންތިޚާބު ކާމިޔާބު ކުރީ މާފަންނު މެދު ދާއިރާގެ މެމްބަރު އަހުމަދު ނަރީޝެވެ.
އެ އިންތިޚާބުގައި ނަރީޝްގެ އިތުރުން ވިލިމާލޭ ދާއިރާގެ ކައުންސިލަރ ނަހުލާ އަލީ އާއި ހުޅުމާލޭ ދާއިރާގެ މެމްބަރު އިބްރާހިމް ޝުޖާއު ވެސް ކުރިމަތި ލެއްވި އެވެ. ނަރީޝްއަށް 5 ވޯޓު ލިބިލެއްވި އިރު ނަހުލާއާއި ޝުޖާއަށް ލިބިލެއްވީ 4 ވޯޓެވެ.
މާލެސިޓީގައި މޭޔަރުގެ އިތުރުން 18 ކައުންސިލަރަކު ތިއްބަވަ އެވެ. އޭގެތެރޭގައި ޕީޕީއެމްގެ 13 މެމްބަރަކު ކައުންސިލް ތަމްސީލު ކުރައްވަ އެވެ. ބާކީ 6 މެމްބަރުން ތަމްސީލު ކުރައްވަނީ އެމްޑީޕީންނެވެ.
އެނގިފައިވާ ގޮތުގައި ޑެޕިއުޓީ މޭޔަރުގެ ވޯޓުގައި އެމްޑީޕީން ވަނީ ކައުންސިލަރ އަހުމަދު ޒަމީރު ހޮވުމަށް ތްރީލައިން ވިޕް އަޅާފައެވެ.
މިހާރު އޮތްގޮތުން ޑެޕިއުޓީއަކަށް އައުން އެންމެ ގާތްކަން ބޮޑީ ނަރީޝެވެ. މިއަދުގެ ޕީޕީއެމްގެ ވޯޓާއެކު އެ ޕާޓީން ވެސް ވަނީ ނަރީޝް އިންތިޚާބު ކުރުމަށް ތްރީލައިން ވިޕް ނެރެފަ އެވެ.
ޕީޕީއެމްއިން މީގެ ކުރިން ޑެޕިއުޓީ މޭޔަރުގެ ކަންތައްތަކުގައި ކަންތައް ކުރާނެ އުސޫލެއް ވަނީ އާންމު ކޮށްފަ އެވެ. ނައިބު ރައީސުން ކަނޑައެޅުމުގައި އަމަލުކުރާނެ ގޮތް ޕީޕީއެމުން ކަނޑައަޅައި މީގެ ކުރިން އާންމު ކުރި ސަރކިއުލާގައި ބުނެފައިވަނީ އެ މަގާމަށް އެއް ބޭފުޅަކަށް ވުރެ ގިނަ ބޭފުޅުން ކުރިމަތިލައްވާފައިވާ ނަމަ، އިންތިހާބު ވެފައިވާ ޕީޕީއެމްގެ ކައުންސިލަރުންގެ މެދުގައި މަޝްވަރާކުރުމަށް ފަހު، ކޮންމެވެސް އެއް ބޭފުޅަކަށް އިއްތިފާގުވެ، އެ ބޭފުޅަކަށް ތާއީދުކުރުމަށެވެ.
ޑެޕިއުޓީ މޭޔަރ އިންތިހާބު ކުރާނީ ކައުންސިލަރުންގެ މެދުގައި ނަގާ ސިއްރު ވޯޓަކުންނެވެ.
×
