ގްރީން ޒޯނުގައި ހުރި ސައިކަލުތަކެއްގައި ރޯކޮށްލި މީހާ ފުލުހުން ހައްޔަރުކޮށްފި އެވެ.
ފުލުހުން މިއަދު ބުނެފައިވަނީ، މިިދިޔަ ހޯމަ ދުވަހުގެރޭ ދަންވަރު ހޮޓެލް ޖެން ކައިރީ ހުންނަ ޕާކިންގ ޒޯންގައި ހުރި ސައިލކަލުތަކެއްގައި އަލިފާން ރޯކޮށްލާފައިވަނީ، އުމުރުން 36 އަހަރުގެ ދިވެހި ފިރިހެނެއްކަމަށެވެ. އަދި، މި މައްސަލައާއި ގުޅިގެން އޭނާ ހައްޔަރުކޮށްފައިވާއިރު، އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް މިއަދު ކޯޓުން އަމުރެއް ނެރެދީފައިވާކަމަށް ފުލުހުން ބުންޏެވެ.
މިމީހާ ސައިކަލުތަކެއްގައި ރޯކޮށްލީ ހޯމަދުވަހުގެ ރޭ ދަންވަރު 3:03 ހާއިރު އެވެ. މިހާދިސާގައި ތިން ސައިކަލު ބޭނުން ނުކުރެވޭ ވަރަށް އަނދާފައިވާއިރު، ޕާކިންގ ޒޯންގައި ހުރި އިތުރު 7 ސައިކަލަކަށާއި ވޭނަކަށް ވަނީ ގެއްލުންވެފަ އެވެ.
ފުލުހުން ދަނީ މި މައްސަލަ ތަހުގީގު ކުރަމުންނެވެ.
