ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ރައްޔިތުންގެ މަޖިލީހުގެ ކުރީގެ މެންބަރު އަހުމަދު ނިހާން ހުސައިން މަނިކު އައްޔަނުކުރައްވައިފި އެވެ.
މަޖިލިސް އިދާރާއިން މައުލޫމާތުދިންގޮތުގައި، ރައްޔިތުންގެ މަޖިލީހުގެ ރައީސް އޮނަރަބަލް ޢަބްދުއްރަޙީމް ޢަބްދުالله، ނިހާން އެމަގާމަށް އައްޔަނުކުރައްވާފައިވަނީ އިއްޔެގެ ވަގުތެއްގަ އެވެ. އަދި، އިއްޔެއިން ފެށިގެން ނިހާން ވަނީ މަގާމުގެ މަސްއޫލިއްޔަތު އަދާކުރަން ފަށްޓަވާފަ އެވެ.
ނިހާން މިމަގާމަށް އައްޔަނުކުރައްވާފައިމިވަނީ ޕާލަމެންޓަރީ ސަރވިސް ގަވާއިދުގެ ދަށުން މަޖިލީހުގެ ރައީސްގެ މަސައްކަތްޕުޅަށް އެހީތެރިވުމުގެ ގޮތުންކަމަށް މަޖިލިސް އިދާރާއިން ބުނެފައި ވެއެވެ. ނިހާން ވަނީ 17 އަދި 18 ވަނަ ރައްޔިތުންގެ މަޖިލީހުގެ މެންބަރުކަން ކުރައްވާފަ އެވެ. އަދި އޭނާވަނީ 18 ވަނަ ރައްޔިތުންގެ މަޖިލީހުގެ ޕީޕީއެމް މެޖޯރިޓީ ލީޑަރުކަންވެސް ކުަރައްވާފަ އެވެ.
ނިހާންގެ ކުރިން ބިއުރޯ ޗީފަކަށް ހުންނެވީ ކުރީގެ ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު ފާތިމަތު މުޙައްމަދު ސޯލިހް އެވެ. ނިމިދިޔަ 19 ވަނަ މަޖިލީހުގެ ރައީސް މުހައްމަދު އަސްލަމް، ފާތިމަތު ބިއުރޯ ޗީފަކަށް އައްޔަނުކުރެއްވީ 2023 ވަނަ އަހަރުގެ ޑިސެންބަރު މަހުގެ 4 ވަނަ ދުވަހު އެވެ.
