ދަށު ކޯޓުތަކުގެ ފަނޑިޔާރުން ޝަރީއަތުގެ މަޖިލީހުގައި ހެދުން އެޅުމުގެ އުސޫލަށް އަމަލު ކުރަން ފަށައިފިއެވެ.
ސުޕްރީމް ކޯޓުން ބުނީ، މި އުސޫލަކީ ދަށު ކޯޓުތަކުގެ ފަނޑިޔާރުން ޝަރީޢަތުގެ މަޖިލިސްތަކުގައި ބޭނުންކުރާނެ ވަކި ހެދުމެއް ނުވަތަ “ޑްރެސް ކޯޑެއް” ކަނޑައެޅުމަށްޓަކައި އެކުލަވާލެވުނު އުސޫލެއް ކަމަށެވެ.
އަދި މި އުސޫލުގެ ބޭނުމަކީ، ޝަރީޢަތުގެ މަޖިލީހުގައި ދަށު ކޯޓުތަކުގެ ފަނޑިޔާރުންނަށް ޑްރެސް ކޯޑެއް ކަނޑައެޅުމާ، އެ ޑްރެސް ކޯޑު ދަށު ކޯޓުގެ ފަނޑިޔާރުންނަށް ފޯރުކޮށްދިނުމާބެހޭ އުޞޫލުތައް ބަޔާންކޮށްދިނުން ކަމަށެވެ.
އެގޮތުން ދަށު ކޯޓުތަކުގެ ފަނޑިޔާރުންގެ ޑްރެސް ކޯޑަކީ ގައުންއެވެ.
އުސޫލުގައި ބުނީ ގައުންގެ ނަމޫނާ ޑިޕާޓްމަންޓް އޮފް ޖުޑީޝަލްެ އެޑްމިނިސްޓޭޝަނުން ތައްޔާރުކޮށް، އާންމުކުރަންވާނެ ކަމަށެވެ.
އަދި އުސޫލަށް އަމަލުކުރަން ފަށާއިރު ފަނޑިޔާރު ކަމުގައު ތިބި ފަނޑިޔާރުންނަށް މި އުޞޫލު ފާސްވެ އާންމުކުރާ ތާރީޚުން ފެށިގެން 4 މަސްދުވަހުގެ ތެރޭގައި ފަނޑިޔާރަކަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން ގައުން ފޯރުކޮށްދޭން ޖެހެއެވެ.
ސުޕްރީމް ކޯޓުން ބުނީ މި އުޞޫލަށް ޢަމަލުކުރަން ފަށާއިރު ފަނޑިޔާރު ކަމުގައި ތިބި ފަނޑިޔާރުންނަށް އުޞޫލަށް ޢަމަލުކުރަން ފަށާ ތާރީޚުން ފެށިގެން ކޮންމެ ދެ އަހަރަކުން އެއް އަހަރު، ޑީޖޭއޭ އިން ގައުން ފޯރުކޮށްދޭން ވާނެ ކަމަށެވެ.
އެހެން ކަމުން އޮކްޓޫބަރު 1 ވަނަ ދުވަހުން ފެށިގެން ދަށު ކޯޓުތަކުގެ ފަނޑިޔާރުން ޝަރީޢަތްކުރާއިރު ތިބެންވާނީ ގައުންގައި ކަމަށް އުސޫލުގައި ބަޔާން ކުރެއެވެ.
