ދަނޑުވެރިކަމަށް ސަރުކާރުން ވަރުވާއަށް ދޫކޮށްފައިވާ، ނ އަތޮޅު ވަވަތިއަށް ލެއްގި ޑިންގީގައި ތިބި ތިން މީހުން އިމިގްރޭޝަންއާ ހަވާލުކޮށްފި އެވެ.
މި ތިން މީހުންނަކީ މިމަހުގެ 22 ވަނަ ދުވަހު ވަވައްޗަށް ލެއްގި ޑިންގީއެއްގައި ތިބި ސޯމާލިޔާއަށް ނިސްބަތްވާ ތިން މީހުންނެވެ. އެދުވަހު އެޑިންގީ އާ އެތިން މީހުން ފުލުހުންގެ ބެލުމުގެ ދަށަށް ގެންދިޔައެވެ. އަދި އޭގެ ފަހުން ނ. ހޮޅުދުއަށް ގެންގޮސް ކައުންސިލްގެ އެހީތެރިކަމާއެކު ވަގުތީގޮތުން އެމީހުންނަށް ބޯހިޔާވަހިކަން ފޯރުކޮށްދީފައި ވެއެވެ.
ފުލުހުން މިއަދު ބުނީ، މިއަދު އެ ތިން މީހުންވެސް ހުޅުމާލެ އިމިގްރޭޝަން ފެސިލިޓީއާ ހަވާލުކޮށްފައިވާކަމަށެވެ.
ފުލުހުން ބުނެފައިވަނީ އެ ތިން މީހުންނަކީ ކަނޑުމަތީގައި ހާލުގައި ޖެހި، ބެހިގެން ރާއްޖެއަށް އާދެވުނު ބައެއްކަން ބެލި ބެލުމުން އެނގިފައިވާކަމަށެވެ.
ދޭތެރެ ދޭތެރެއިން އެހެން ގައުމުތަކުގެ މަސްވެރިން ހާލުގައި ޖެހިގެންނާއި، މަސްވެރިކަމުގައި ރާއްޖޭގެ ކަނޑުގެ ސަރަހައްދުތަކަށް ވަދެ އުޅެއެވެ. މީގެ ކުރިންވެސް ސޯމާލިއާއަށް ނިސްބަތްވާ އުޅަނދުތައް ރާއްޖެ އެތެރެވެފައި ވެއެވެ.
