ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއާއި ގުޅިގެން މަޖިލީހުން ކުރިއަށް ގެންދާ އިންކުއަރީއަށް ޑިފެންސް މިނިސްޓަރު މާރިޔާ އަހުމަދު ދީދީ ހާޒިރުކޮށްފި އެވެ.
އިންކުއަރީ ކުރިއަށް ގެންދާ 241 ކޮމިޓީއަށް މާރިޔާ ހާޒިރު ކުރީ މިއަދު ހެނދުނު 10:00 ގައެވެ. މި ކޮމިޓީގެ ބައްދަލުވުންތައް ކުރިއަށް ގެންދަނީ ސިއްރުކޮށްގެންނެވެ.
މާރިޔާ ކޮމިޓީއަށް ހާޒިރު ކޮށްފައިވާއިރު މީގެ ކުރިން އެ މިނިސްޓްރީގެ ގިނަ އިސް ބޭފުޅުންނާވެސް ވަނީ ސުވާލު ކޮށްފަ އެވެ. އެގޮތުން ޗީފް އޮފް ޑިފެންސް ފޯސް މޭޖާ ޖެނަަރަލް އަބްދުﷲ ޝަމާލް އާއި ވައިސް ޗީފް އޮފް ޑިފެންސް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފް ވެސް ވަނީ ކޮމިޓީއަށް ހާޒިރުކޮށް ސުވާލު ކޮށްފަ އެވެ.
ޑިފެންސް މިނިސްޓަރު މާރިޔާ އަހުމަދު ދީދީ މަޖިލީހުގެ 241 ކޮމިޓީގައި
ކޮމިޓީގެ މެމްބަރުން އިއްޔެ ވަނީ މައުލޫމާތުތަކެއް ހޯދުމަށް ސިފައިންގެ މައި މަރުކަޒަށްވެސް ވަޑައިގެންފަ އެވެ. އެ މަރުކަޒަށް ވަޑައިގެންނެވީ ކޮމިޓީގެ މުގައްރިރު މުހައްމަދު އަސްލަމާއި ނައިބް މުގައްރިރު ހަސަން ލަތީފުގެ އިތުރުން ހުޅުމާލެ ދާއިރާގެ މެންބަރު އަލީ ނިޔާޒު އެވެ. އަސްލަމް ވިދާޅުވެފައިވަނީ ސިފައިންގެ މަރުކަޒުން ލިބުނު މައުލޫމާތު ހާމަ ނުކުރައްވާނެ ކަމަށެވެ.
މަޖިލިސް އިންކުއަރީގައި ސުވާލު ކުރުމަށް ވަކި ވަކި ސިފައިން ހާޒިރު ކުރަން ކޮމިޓީން ނިންމުމާއި ގުޅިގެން ޑިފެންސުން ވަނީ ވަކި ވަކި ސިފައިން ހާޒިރު ނުކުރެވޭނެކަމަށް ބުނެ ސިޓީއެއްވެސް ފޮނުވައިފަ އެވެ. އެމައްސަލަ ހޫނުވެ އެސިޓީގައި ސޮއިކުރެއްވި މިނިސްޓްރީގެ އިސް ވެރިއަކަށް ޖިނާއީ ދައުވާ ކުރަންވެސް ކޮމިޓީން މަސައްކަތް ކުރި އެވެ. އެހެންނަމަވެސް ކޮމިޓީން އެގޮތަށް ފާހެއް ނުވި އެވެ.
ސިފައިންގެ އިސް ބޭފުުޅުންގެ އިތުރުން ފުލުހުންގެ އިސް ބޭފުޅުންވެސް ދަނީ އިންކުއަރީއަށް ހާޒިރު ކުރަމުންނެވެ. އެގޮތުން އިއްޔެ ވަނީ ހޯމް މިނިސްޓަރު އިމްރާން އަބްދުﷲ ވެސް ކޮމިޓީއަށް ހާޒިރުކޮށް ސުވާލުކޮށްފަ އެވެ. މީގެ އިތުރުން ޕޮލިސް ކޮމިޝަނަރު މުހައްމަދު ހަމީދުގެ އިތުރުން ފުލުހުންގެ ކައުންޓަ ޓެރަރިޒަމްގެ ޑިރެކްޓަރު ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލް ވެސް ކޮމިޓީއަށް ހާޒިރު ކުރި އެވެ.
މަޖިލީހުން އިންކުއަރީއެއް ފަށައިގެން ކުރިއަށް ގެންދަނީ ރައީސް ނަޝީދަށް ދިން ހަމަލާގައި ސަލާމަތީ ބާރުތަކުން ބްރީޗުވި ގޮތް ބެލުމަށެވެ. ނަޝީދަށް ބޮމުގެ ހަމަލާއެއް ދިނީ އެމަނިކުފާނު ދިރިއުޅުއްވާ ގ ކެނެރީގެއިން ނިކުމެވަޑައިގެން ކާރުކޮޅަށް އެރުމަށް ހިންގަވާފައި ވަޑައިގަންނަވަނިކޮށެވެ.
