ލޯކަލް ގަވާމެންޓް އޮތޯރިޓީ (އެލްޖީއޭ)ގެ ބޯޑަށް ށ. އަތޮޅުގެ ރައީސް މުހައްމަދު ޝިޔާމް އިންތިހާބުވެވަޑައިގެންފި އެވެ.
އޭނާ އެލްޖީއޭގެ ބޯޑުގެ ގޮނޑި ކާމިޔާބު ކުރެއްވީ މިދިޔަ ބުދަ ދުވަހު ބޭއްވި އިންތިހާބުގައި 9 ވޯޓު ހޯއްދަވައިގެންނެވެ.
އެލްޖީއޭގެ ބޯޑުގައި ކައުންސިލްތައް ތަމްސީލްކުރައްވާ 3 މެންބަރުން ތިއްބަވައެވެ. އެއީ ރަށު ކައުންސިލް، އަތޮޅު ކައުންސިލް އަދި ސިޓީ ކައުންސިލްގެ ރައީސުންގެ ތެރެއިން އިންތިހާބުކުރާ ތިން މެންބަރުންނެވެ. ޝިޔާމް އިންތިހާބުވީ، އަތޮޅު ކައުންސިލްތަކުގެ ފަރާތުން އިންނަވާ މެމްބަރުގެ މަގާމަށެވެ.
އޭނާގެ ވާދަވެރި ކެންޑިޑޭޓް، ލ. އަތޮޅު ކައުންސިލްގެ ރައީސް އިސްމާއީލް އަލީ އަށް ލިބިވަޑައިގެންނެވީ 6 ވޯޓެވެ.
އެލްޖީއޭގެ ބޯޑުގައި އަތޮޅު ކައުންސިލްތައް ތަމްސީލުކުރައްވާ މެމްބަރުގެ ގޮނޑި ހުސްވީ، އެ މަގާމުގައި ކުރިން ހުންނެވި، މާލެ އަތޮޅު ކައުންސިލްގެ ރައީސް މުހައްމަދު ނިމާލް އެ މަގާމުން މިދިޔަ ޑިސެމްބަރުގައި އިސްތިއުފާދެއްވުމުން ނެވެ.
