ރިޔާސީ އިންތިހާބުގެ ތެރޭގައި ރައީސް ޑރ މުހައްމަދު މުއިއްޒު ވެވަޑައިގެންނެވި ވައުދުފުޅާ އެއްގޮތަށް ''މީޑިއާ ވިލެޖް'' ހަދާނީ ހުޅުމާލޭގައި އެސްޓީއޯ އިން އަޅާފައިވާ ހޮޓެލް އިމާރާތުގައި ކަމަށް އެމަނިކުފާނު ރޭ ވިދާޅުވެއްޖެ އެވެ.
ރައީސް އެކަން ހާމަކުރެއްވީ ރާއްޖޭގެ 59 މިނިވަން ދުވަހުގެ މުނަސާތަބުގައި ބޭއްވި ޖަލްސާގަ ވާހަކަ ދައްކަވަމުން ނެވެ.
ރަައީސް ވިދާޅުވި ގޮތުގައި އެ ހޮޓެލް އިމާާރާތުގެ ބައެއް ފަންގިފިލާތައް މީޑިއާ ވިލެޖަށް ހާއްސަކުރައްވާނެ ކަމަށެވެ. އަދި ކޮންމެ މީޑިއާއަކަށް ވެސް އޮފީސް ހިންގުމަށް އަގުހެޔޮ ކޮށް އެތަނުން ޖާގަ ލިބޭނެ ކަމަށް ވެސް ވިދާޅުވި އެވެ.
"މި މަސައްކަތް އިރާދަކުރެއްވިއްޔާ ކުރިއަށް އޮތް 1 އަަހަރު ތެރޭގައި ނިމިގެންދާނެ" ރައީސް ވިދާޅުވި އެވެ.
އެމަނިކުފާނު ވިދާޅުވީ ސަރުކާރުގެ އިދާރާތަކުން މައުލޫމާތު ހޯދުމަށް ހުށަހަޅާފައިވާ އެއްވެސް ފޯމަކަށް ޖަވާބު ނުދީ ނޯންނާނެ ކަމަށެވެ. ރައީސް އޮފީހާއި ސަރުކާރުގެ ހުރިހާ އިދާރާއަކުންވެސް މައުލޫމާތު ހޯދުމަށް ހުށަހަޅާ ފޯމުތަކަށް ޖަވާބު ދޭނެ ކަމަށާއި ޖަވާބު ދިނުމަށް ސަރުކާރުން ޖެހިލުންވެގެން ނޫޅޭ ކަމަށެވެ.
ރައީސް ވިދާޅުވީ އެމަނިކުފާނު ބޭނުންވަނީ ދެފުށްފެންނަ ސަރުކާރެއް ހިންގަން ކަމަށެވެ. ވަޒީރުން އަދި އެމަނިކުފާނުވެސް އާންމު ފޯރަމުތަކަށް ވަޑައިގެން ރައްޔިތުން ކުރާ ކޮންމެ ސުވާލަކަށް ޖަވާބު ދެއްވަނީ ކަންކަން ހާމަކުރަން ބޭނުންވާތީ ކަމަށާއި މީޑިއާއަށް ފުރިހަމައަށް އެއްބާރުލުން ދެއްވާނެ ކަމަށްވެސް ވިދާޅުވި އެެވެ.
