ފަޅު އިމާރާތެއްގެ ގޮތުގައި ހުންނަ އޯކިޑް ޕްލާޒާގައި ހުރި ކުނިތަކެއްގައި ރޯވި އަލިފާންގަނޑު ނިއްވާލައިފި އެވެ.
ބުރުޒުމަގުގައި ހަތަރު ބުރިއަށް ހަދާފައިވާ އޯކިޑް ޕްލާޒާ އަކީ ސަރުކާރުގެ ކުރީ ޝިޕިން ކުންފުނި، އެމްއެންއެސްއެލް އިން އިމާރާތްކޮށް މީހުން ދިރިއުޅެން ކުއްޔަށް ދޭން ހެދި ތަނެކެވެ. ނަމަވެސް އެތަން ވަރަށް ބޮޑަށް ބާވެ، ހަލާކުވުމުން އެތަނުގައި މީހާރު މީހުން ދިރިނޫޅޭތާ އެތައް އަހަރެއްވެއްޖެ އެވެ. މީހުންނަށް ނުވަދެވޭ ގޮތަށް ބަންދުކޮށްފައި ހުރި ނަމަވެސް އެތަން މިހާރު އާއްމުކޮށް ބޭނުންކުރަނީ މަސްތުވާތަކެތި ބޭނުންކުރާ މީހުން ކަމަށްވެ އެވެ.
އެ ހާދިސާގެ މައުލޫމާތު، ރޭ ފަތިހު 03:31 ހާއިރު ފަޔާ އެންޑް ރެސްކިއު ސާވިސްއަށް ލިބުމާއެކު، ފަޔާފައިޓަރުން އެ ސަރަހައްދަށް ގޮސް ކުރި މަސައްކަތުން، އަލިފާންގަނޑު އެއްކޮށް ނިއްވާލެވުނީ ރޭ ފަތިހު 04:49 ހާއިރު ކަމަށް އެމްއެންޑީއެފްއިން ބުނެއެވެ.
މ. އޯކިޑްޕްލާޒާ ގެއަކީ މީހުން ދިރިނޫޅޭ ގެއެކެވެ. އެމްއެންޑީއެފްއިން ވިދާޅުވި ގޮތުގައި، އެ ހާދިސާގައި އެއްވެސް މީހަކަށް އަނިޔާއެއް ލިބިފައިނުވެއެވެ.
އަލިފާނުގެ ސަބަބުން މުޅި ސަރަހައްދަށް ދުން ފެތުރުނު އިރު، އެކަމުގެ ސަބަބުން އަލިފާން ކޮންޓްރޯލު ވަންދެން ކައިރި އިމާރާތްތަކުން މީހުން ވަނީ ފައިބައިފައެވެ.
