ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ރައްޔިތުންގެ މަޖިލީހަށް ހުށަހަޅުއްވާފައިވާ ގާނޫނުލް އުގޫބާތަށް އިސްލާހު ގެނައުމުގެ ބިލު ފާސްކުރުމާއި ދެކޮޅަށް ސޮއިކުރަން ހުޅުވައިލި ޕެޓިޝަންގައި 6،000 އަށްވުރެއް ގިނަ މީހުން ސޮއިކޮށްފި އެވެ.
ހިސާންގެ ނަފުރަތު ހުއްޓުވުމުގެ ބިލު ފާސްކުރުމަށް ތާއީދުކޮށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވައި ފެއްޓެވި ޕެޓިޝަންގައި މިހާތަނަށް ސޮއި ކުރީ 2،409 މީހުންނެވެ.
ބޮޑު ތަރުހީބެއް ލިބެމުންދާ ނަފުރަތުގެ ބިލާ ދެކޮޅު ޕެޓިޝަންގައި ބުނެފައިވަނީ 2008 ވަނަ އަހަރު ޑިމޮކްރަސީއެއް ރާއްޖޭގައި ފުރަތަމަ ތައާރަފުވެގެން ދިޔުމާއިއެކު ރާއްޖޭގައި އެންމެ ނުރައްކާތެރި ކަމެއްގެ ގޮތުގައި ފުޅާވަމުން އައިސްފައިވަނީ ސެކިއުލަރިޒްމް ކަމަށެވެ. ސެކިއުލަރިޒްމް އަކީ ދީނާއި ދައުލަތާއި ވަކިކުރުމުގެ ފިކުރެވެ.
އެޕެޓިޝަންގައި ބުނީ މިނިވަންކަމާއި ހައްގުތަކުގެ ނަމުގައި އަންނަންފެށި އާ ކަންކަމުގެ ސަބަބުން ދީނީ ކަންކަމަށް ހުރަސް އެޅެމުން ދާކަމަށެވެ. އެގޮތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެންދަވަނީ ރާއްޖޭގައި ސެކިއުލަރިޒްމް ފެތުރުމަށް ފުޅާ ދާއިރާއެއްގައި މަސައްކަތް ކުރައްވައި ވަކާލާތު ކުރައްވަމުން ކަމަށް ޕެޓިޝަންގައި ބުންޏެވެ.
މީގެ ކުރިން 2010 ވަނަ އަހަރު ޑެންމާކުގައި ނަޝީދު ދެއްކެވި ވާހަކަފުޅަކަށް އިޝާރާތް ކުރައްވައި ޕެޓިޝަންގައި ބުނީ ނަޝީދު ވަނީ ކީރިތި ގުރުއާނާއި ރަސޫލާގެ ހަދީޘް ނޫން އެހެން ހައްލެއް މުސްލިމުންނަށް ބޭނުންވާ ކަމަށް ބުނެ ދީނަށް ފުރައްސާރަ ކޮށްފައި ކަމަށެވެ. މީގެ އިތުރުން ގުރުއާނާއި ރަސޫލާގެ ސުންނަތުން ސާބިތުވާން އޮތް ހުކުމްތަކަށް ނަޝީދު ފާޅުގައި ދެކޮޅު ހައްދަވާކަންވެސް ވަނީ ފާހަގަކޮށްފަ އެވެ. އެގޮތުން ގިސޯސް ހިފުމާއި ދެކޮޅަށް ނަޝީދު ވާހަކަ ދައްކަވާކަމަށް ޕެޓިޝަންގައި ވަނީ ބުނެފަ އެވެ.
ރާއްޖޭގައި ފުޅާވަމުން އަންނަަ ސެކިއުލަރިޒަމްއާއި ވަކި ދީނެއް ގަބޫލު ނުކުރުމުގެ ފިކުރާއި ގުޅިގެން ބަޔަކު ފާޅުގައި ދީނަށް ފުރައްސާރަ ކުރަމުން ދާއިރު އެފަދަ މީހުންނާއިމެދު ފިޔަވަޅު އަޅަން ސަރުކާރު ނުކުޅެދިފައިވާކަމަށް ޕެޓިޝަންގައި ބުންޏެވެ. އެހެންނަމަވެސް އެފަދަ މީހުންނާއި ދެކޮޅަށް ރައްޔިތުން އަޑު އުފުލާނެ ކަމަށް ބުންޏެެވެ.
ގާނޫނުލް އުގޫބާތަށް އަލަށް ހުށަހެޅިފައިވާ އިސްލާހަކީ ސެކިއުލަރިޒްމް އާއި އެތީސްޓުންގެ ވާހަކަތަކާއި ދެކޮޅަށް އަޑު އުފުލުން ހުއްޓުވުމުގެ ގޮތުން ސަރުކާރުން ކުރާ މަސައްކަތެއްގެ ގޮތުގައި ސިފަކޮށް ޕެޓިޝަންގައި ވަނީ އެ ބިލާއި ދެކޮޅު ހަދައިފަ އެވެ.
ރައީސް ނަޝީދު އިސްވެ ހުންނަވައި ފެއްޓެވި ޕެޓިޝަންގައި ބުނީ އެކަކު އަނެކަކަށް "ލާދީނީ" ގޮވައި ކާފަރު ކުރުން ހުއްޓުވަން ޖެހޭ ކަމަށެވެ. އެއީ އެފަދަ ކަންކަން ނިންމަން ޖެހޭނީ ކޯޓުތަކުން ކަމަށާއި އެއީ ވަކި ވަކި ފަރުދުން ނިންމާނެ ކަންކަން ނޫން ކަަމަށް ޕެޓިޝަންގައި ވަނީ ބުނެފަ އެވެ.
މީހުން ކާފަރު ކުރުމުގެ ސަބަބުން ލޭ ހުއްދަކޮށް ލޭ އޮހޮރުވަމުން ދާކަން ޕެޓިޝަންގައި ފާހަގަކުރި އެވެ. އެގޮތުން މިވޭތުވެ ދިޔަ 10 އަހަރު ތެރޭގައި އެފަދަ ހާދިސާތައް ހިނގާފައިވާކަމަށް ޕެޓިޝަންގައި ބުންޏެވެ. މިސާލަކަށް ނެންގެވީ ނަޝީދަށް މިދިޔަ މަހު ދިން ޓެރަރިސްޓު ހަމަލާ އެވެ.
ލާދީނީ ގޮވުމަކީ ހަރުކަށި ފިކުރުގެ މީހުންގެ އެންމެ ވަރުގަދަ ހަތިޔާރު. އިސްލާމް ދީނަކީ އަމަނައާއި ސުލްހައިގެ ދީން. ބޭނުންވަނީ އެކަކު އަނެކަކަށް އިހުތިރާމް ކުރާ ޒަމާނީ އިސްލާމީ މުޖުތަމައެއް
- ޕެޓިޝަން
އެހެންކަމުން އެޕެޓިޝަންގައި ވަނީ ގާނޫނުލް އުގޫބާތަށް ތުޅާދޫ ދާއިރާގެ މެމްބަރު ހިސާން ހުސައިން ހުށަހަޅުއްވާފައިވާ އިސްލާހު ފާސްކުރުމަށް ތާއީދު ކުރާކަމަށް ލިޔެފަ އެވެ. އެއާއެކު ބުނެފައިވަނީ މިއަދު މިކަން ނުކޮށްދިނަމަ މާދަމާ އަހަރުމެންގެ ދަރިންނަށް ދިރިއުޅެވޭނެ މުޖުތަމައުއެއް ލިބުން އުނދަގޫ ވާނެކަމަށެވެ. އަދި މިކަން ދޭހަވާނެ އެތައް ހާދިސާއެއް ހިނގައިފިކަމަށްވެސް ނަޝީދުގެ ޕެޓިޝަންގައި ބުންޏެވެ.
