އެމަނިކުފާނުގެ ސަރުކާރުގައި ހިންގި ކޮރަޕްޝަން ކަމަށްވާ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރްސީގެ) ކޮރަޕްޝަން މައްސަލަ ބަލަން ރައީސް ޑރ. މުހައްމަދު މުއިއްޒަށް ކެރިވަޑައިނުގަންނަވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީސް ޖަލްސާގައި ރޭ ވާހަކަދައްކަމުން ޔާމީން ވިދާޅުވީ ސަރުކާރުގެ ސުޕާ މެޖޯރިޓީ ރައްޔިތުންގެ މަޖިލީހުގައި އޮވެގެން އަދި މަޖިލީހުގެ ރައީސް އަބްދުއްރަހީމް އަބްދުﷲ މެންފަދަ ބޭފުޅުންގެ ނަން އެ ލިސްޓުގައި ތިބުމުން އެ މައްސަލަ ބަލަން ފުލުހުންނަށް ވެސް ނުކެރޭނެ ކަމަށެވެ. އެމްއެމްޕީއާރްސީގެ މައްސަލާގައި ކުރީގެ ނައިބު ރައީސް އަހުމަދު އަދީބުގެ ފަރާތުން ލިބިފައިވާ މައުލޫމާތުތަކާއި ލިސްޓެއް ފުލުސް އޮފީހުގައި އޮންނާނެ ކަމަށާއި އެމްއެމްޕީއާރްސީގެ މައްސަލައާ ގުޅޭ ޝަރީއަތްތައް ލައިވް ކުރާއިރު، އެ ލިސްޓު ފޮރުވައިގެން ހާމަނުކޮށް އުޅޭ ސަބަބާއި މެދު ސުވާލު އުފެދޭ ކަމަށް ވިދާޅުވި އެވެ.
ރައީސް ޔާމީން ވަނީ އެމްއެމްޕީއާރުސީގެ ކޮރަޕްޝަން މައްސަލަ މިސަރުކާރުން ނުބެލޭނެ ކަމަށް ވިދާޅުވަނީ ރައީސް ޑރ. މުއިއްޒަށް ޗެލެންޖް ކުރައްވާފަ އެވެ.
"އެމްއެމްޕީއާރުސީގެ ހިޔާނާތުގައި ބޮޑެތި ކަޅު ފައިސާ ނަގާފައި ހުރި މީހުން އެ ތިބީ ރައީސް އޮފީހުގައި، ވަޒީރުންގެ ގޮތުގައި، މުއިއްޒު ކޮން ވާހަކައެއްތޯ އެ ދައްކަވަނީ،" ޔާމީން ރައީސަށް ޗެލެންޖުކުރެއްވި އެވެ.
އެމްއެމްޕީއާރުސީގެ ފައިސާ ދައުރުވި ގޮތް ބަލައި، އެ ހިޔާނާތުގެ މުގުލުގައި ހުންނެވި ކުރީގެ ނައިބު ރައީސް އަހުމަދު އަދީބު މެދުވެރިކޮށް ލިބުނު މައުލޫމާތުތަކުން ފުލުހުންނަށް ފައިސާ ލިބުނު މީހުންގެ ލިސްޓެއް އެކުލެވިފައި އޮންނާނެ ކަމަށް އެމަނިކުފާނު ވިދާޅުވި އެވެ. އެ ލިސްޓު އާންމު ކުރުމަށް ރައީސް މުއިއްޒު ފުލުހުންނަށް އަންގަވަން ޖެހޭނެ ކަމަށް ވިދާޅުވި އެވެ.
ޔާމީން ވިދާޅުވީ ރައީސް މުއިއްޒުގެ އަރިހުގައި ތިބި ބޮޑުންގެ ތެރޭގައި މިހާރު ވެސް ތިއްބެވީ ކޮރަޕްޝަނުގެ އަމަލުތައް ހިންގާފައިވާ ބޭފުޅުން ކަމަށެވެ. އެގޮތުން މިހާރުގެ ފޮރިން މިނިސްޓަރ މޫސާ ޒަމީރުގެ އަންހެނުންގެ ދޮންބައްޕަގެ ނަމުގައި ނެގުމަށްފަހު ލިކިއުޓޭޓްކުރުމަށްފަހު ހުރިހާ ފައިސާއެއް ހުރީ ޒަމީރުގެ އަމިއްލަ އެކައުންޓުގައި ކަމަށް ވިދާޅުވި އެވެ.
"މިހާރުގެ އެހުރި ފޮރިން މިނިސްޓަރު މޫސާ ޒަމީރުގެ އަންހެނުންގެ ދޮންބައްޕަ ނަމުގައި ނަގާފައި ލިކިއުޓޭޑްކޮށްފައި ހުރިހާ ފައިސާއެއް އެހުރީ އޭނާގެ އެކައުންޓުގައި. ދެން ކޮން ވާހަކައެއްތޯ މި ދައްކަވަނީ ދުވަހަކުވެސް މީހަކަށް ކޮރަޕްޝަން ނުބޭލޭ ވަރަށް ބަލާނަމޭ. ރައްޔިތުންގެ މަޖިލީހުގެ ރައީސް އަބްދުއްރަހީމްގެ ވާހަކަ ތި ވިދާޅުވީ އޮއިއްޓޭގެ ބަޔާނުގައި އޮތް ވާހަކަ. ކިހިނެއްތޯ މިކަހަލަ ކަންތައްތައް ބަލާނީ މުއިއްޒު. މުއިއްޒަކަށް ނުބެލޭނެ މިކަންކަމެއް،" ޔާމީން ވިދާޅުވި އެވެ.
