އުމުރުން 13 އަހަރުގެ ކުއްޖަކު ރަހީނުކޮށް މަރާލާފައި އޮއްވާ ރޭ ހުޅުމާލެއިން ފެނިފައިވާއިރު، އެމައްސަލައާއި ގުޅިގެން ދެ މީހަކު ފުލުހުން ހައްޔަރުކޮށްފި އެވެ.
ފުލުހުން މައުލޫމާތު ދޭ ގޮތުގައި 13 އަހަރުގެ ކުއްޖާ ރަހީނުކުރި މައްސަލަ ފުލުހުންނަށް ހުށަހެޅީ މިދިޔަ އާދިއްތަ ދުވަހު އެވެ. ފުލުހުން ދިޔައީ އެކުއްޖާ ހޯދަމުންނެވެ.
އެކުއްޖާ މަރާލާފައި އޮއްވާ ފެނުނީ ރޭ ދަންވަރު 2:30 ހާއިރު ހުޅުމާލެ ދެވަނަ ފިޔަވަހިންނެވެ. ކުއްޖާ އޮތީ ކަރުތާފެނާ ހިސާބުން މޫދުގަ އެވެ.
މިމައްސަލައާއި ގުޅިގެން ފުލުހުން ހައްޔަރުކޮށްފައިވަނީ އުމުރުން 17 އަހަރުގެ ފިރިހެން ކުއްޖަކާއި 27 އަހަރުގެ ފިރިހެނެކެވެ. ދެމީހުންގެ އިތުރު ތަފްސީލެއް ފުލުހުން ހާމައެއް ނުކުރެ އެވެ.
މައުލޫމާތު ލިބިފައިވާ ގޮތުގައި 13 އަހަރުގެ ކުއްޖާ ގެއްލިގެން މީގެ ކުރިންވެސް އާއިލާއިން ފުލުހުންނަށް ރިޕޯޓު ކުރި އެވެ. އެގޮތުން މިދިޔަ ހަފްތާ އެކުއްޖާ ގެއްލިގެން ރިޕޯޓު ކުރުމުން ފުލުހުން އެކުއްޖާ ހޯދައި އާއިލާއާއި ހަވާލުކުރި ކަމަށްވެސް ވެއެވެ.
ހައްޔަރުކުރި ދެ މީހުންނާއި ބެހޭ އިތުރު މައުލޫމާތެއް ފުލުހުން ހާމަކޮށްފައި ނުވިނަމަވެސް އެ ދެމީހުންނަކީ ދެ އެކުވެރިންކަން ވަނީ އެނގިފަ އެވެ.
13 އަހަރުގެ ކުއްޖާ މޫދުން ފެނުނުއިރު އެކުއްޖާގެ ހަށިގަނޑުން އަނިޔާކޮށްފައިވާކަމުގެ ނިޝާން ފެންނަން ހުރިކަމަށް މައުލޫމާތު ލިބެ އެވެ. އެގޮތުން އެއްޗެއް އައްސައި ވާންކޮށްފައި ހުރިކަމުގެ ނިޝާން އެކުއްޖާގެ ކަރުގައި ހުރިކަންވެސް ވަނީ އެނގިފަ އެވެ.
