އިންޑިއާގެ ބޭރު ގުޅުންތަކާބެހޭ މިނިސްޓަރު ސުބްރަމާނިޔަމް ޖައިޝަންކަރު މިއަދު ހަވީރު ރާއްޖެއަށް ވަޑައިގެންފިއެވެ. މިއީ ރައީސް މުޙައްމަދު މުޢިއްޒުގެ ވެރިކަމުގައި އިންޑިއާގެ ވަޒީރަކު ރާއްޖެއަށް ކުރައްވާ ފުރަތަމަ ރަސްމީ ދަތުރެވެ.
މި ސަރުކާރުގެ ދައުރުގައި އިންޑިއާއާއި ރާއްޖޭގެ ގުޅުން ހީނަރުވެފައި ވަނިކޮށް ރާއްޖެ ވަޑައިގެންނެވި ޖައިޝަންކަރަށް ވެލާނާ އިންޓަނޭޝަނަލް އެއަރޕޯޓުގައި މަރުޙަބާ ދެންނެވީ ރާއްޖޭގެ ބޭރު ގުޅުންތަކާބެހޭ ވަޒީރު މޫސާ ޒަމީރެވެ.
ޒަމީރުގެ ދަޢުވަތަކަށް ކުރައްވާ މި ދަތުރުގައި އަންނަ އާދީއްތަ ދުވަހުގެ ނިޔަލަށް ޖައިޝަންކަރު ރާއްޖޭގައި މަޑުކުރައްވާނެ ކަމަށް ރައީސް އޮފީހުން ބުނެފައިވެއެވެ. މި ދަތުރުފުޅުގައި:
* ޖައިޝަންކަރު ރައީސް މުޢިއްޒުގެ އަރިހަށް އިޙްތިރާމުގެ ޒިޔާރަތެއް ކުރައްވާނެއެވެ.
* ދެ ޤައުމުގެ ދެމެދުގައި އެކި ދާއިރާތަކުން ގުޅުން ބަދަހިކުރުމާ ބެހޭގޮތުން ޒަމީރާ މަޝްވަރާކުރައްވާނެއެވެ.
* ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް (އެޗްއައިސީޑީޕީ) އާއި އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓް ފެސިލިޓީގެ ދަށުން ނިމިފައިވާ މަޝްރޫޢުތައް އިފްތިތާޙު ކޮށްދެއްވާނެއެވެ.
* މީހުން ތަމްރީނުކުރުމާއި ވިޔަފާރިއާ ގުޅޭ ދާއިރާތަކުން އެމްއޯޔޫތަކެއްގައި ސޮއިކުރައްވާނެއެވެ.
މިއީ ރާއްޖެ-އިންޑިއާ ގުޅުން ބަދަހިވަމުންދާކަން ދައްކުވައިދޭނެ ދަތުރަކަށް ވާނެ ކަމަށް ސަރުކާރުން ބުނެފައިވެއެވެ.
