މިދިޔަ ސަރުކާރުން ޤާނޫނާ ޚިލާފަށް ގިނަ ފަރާތްތަކަކަށް ބަދަލު ދީފައިވާކަމަށާއި އެފަދަ ހުރިހާ ބަދަލުތައް ކެންސަލް ކުރާނެ ކަމުގައި ބަންޑާރަނައިބު އަޙްމަދު އުޝާމް ވިދާޅުވެއްޖެއެވެ.
ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އުޝާމް ވިދާޅުވީ، ގެއްލުމުގެ ބަދަލުގެ ގޮތުގައި ފައިސާގެ އިތުރުން ރަށްތަކާއި ފަޅުތައްވެސް ދޫކޮށްފައިވާކަން ފާހަގަކުރެވިފައިވާ ކަމަށެވެ.
ރާއްޖެއަށް ދިމާވެފައިވާ ޑޮލަރުގެ ދަތިކަން ހައްލު ކުރުމަށްޓަކައި ބައެއް ކަހަލަ ގާނޫނުތަކަށް ގެންނަން ޖެހޭ އިސްލާހުތަކާ ގުޅޭ ގޮތުން މަޝްވަރާކޮށް ގޮތްތަކެއް ނިމިފައިވާ ކަމަށް ވެސް އުޝާމް ވިދާޅުވިއެވެ. ކުރިއަށް އޮތް ދެތިން ހަފްތާގެ ތެރޭގައި ބައެއް ގާނޫނުތަކަށް އިސްލާހު ގެނެސް، ޑޮލަރުގެ ދަތިކަމަށް ހައްލެއް ހޯދުމަށް އިތުރު މަސައްކަތްތަކެއް ކުރުމަށް ހަމަޖެހިފައިވާ ކަމަށް ވެސް އުޝާމް ވިދާޅުވިއެވެ.
އެގޮތުން ޕެންޝަނާ ބެހޭ ގާނޫނަށް އިސްލާހުތަކެއް ގެނައުމާއި އިންކަމް ޓެކްސްގެ ގާނޫނަށް ބައެއް ބަދަލުތައް ގެނައުމަށް ހަމަޖެހިފައިވާ ކަމަށް އުޝާމް ވިދާޅުވިއެވެ. އަދި މީރާ އަށް ލިބޭ އާމްދަނީ މިހާރަށް ވުރެ ބޮޑަށް އިތުރުކޮށް، މީރާގެ ގަވައިދުތަކަށް ނޫނީ ގާނޫނަށް ގެންނަން ޖެހޭ ބަދަލުތައް ގެންނަން ޖެހޭ ނަމަ، އެކަން ކުރުމަށް ނިންމާފައިވާ ކަމަށް ވެސް އުޝާމް ވިދާޅުވިއެވެ.
"ހަމައެއާ އެކީގައި އެމްއެމްއޭ އާ އެކީގައި އަޅުގަނޑުމެން މަސައްކަތްތަކެއް އެބަކުރަން ރާއްޖެއަށް ބޭރު ފައިސާ ހޯދުމަށް ދިމާވެފައިވާ ދަތިތަކަށް ހައްލު ހޯދުމަށް." ބަންޑާރަ ނައިބު ވިދާޅުވިއެވެ.
އުޝާމް އިތުރަށް ވިދާޅުވީ މިހާރު މި މަސައްކަތްތައް ނިންމާލުމުގެ މަރުޙަލާގައި ކަމަށާއި، ވީހާވެސް އަވަހަކަށް ޝަރީޢަތަށް ހުށަހަޅަންޖެހޭ މައްސަލަތައް ހުށަހަޅައި، ޝަރީޢަތަށް ހުށަނާޅާ ބާޠިލުކުރެވޭނެ އެއްބަސްވުންތައް ބާޠިލުކުރުމުގެ މަސައްކަތް ކުރިއަށްގެންދާނެ ކަމަށެވެ.
