ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވި "5 އަހަރުން 5 މިލިއަން ގަސް" ޕްރޮގްރާމުގެ ދަށުން މިހާތަނަށް 30,371 ގަސް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އިންދައިފިއެވެ. މި ޕްރޮގްރާމުގެ ތެރެއިން ސްޓެލްކޯއިން އަމާޒު ހިފާފައިވަނީ 5 އަހަރު ތެރޭގައި 5 ލައްކަ ގަސް އިންދުމަށެވެ.
ސްޓެލްކޯއިން މަޢުލޫމާތު ދެއްވާފައިވާ ގޮތުގައި:
– ޖޫން 5 ވަނަ ދުވަހު ކ. ތުލުސްދޫ އަދި ސްޓެލްކޯއިން ޚިދުމަތްދޭ އެހެން ރަށްރަށުގައި ޖުމުލަ 21,007 ގަސް އިންދާފައިވެއެވެ.
– ކ. ދިއްފުށީގައި އައު އިންޖީނުގޭގެ ބިންގާ އެޅުމުގެ ރަސްމިއްޔާތުގައި 1,000 ގަސް އިންދާފައިވެއެވެ.
– އެހެނިހެން ރަށްރަށުގައި ހިންގި ހަރަކާތްތަކުގައި 8,364 ގަސް އިންދާފައިވެއެވެ.
ކުރިއަށް އޮތް ތަނުގައި، ސްޓެލްކޯއިން ޚިދުމަތްދޭ ރަށްރަށުގައި ކޮންމެ މަހަކުވެސް ގަސް އިންދުމުގެ ހަރަކާތްތައް ކުރިއަށް ގެންދިއުމަށް ވަނީ ރޭވިފައެވެ. މިއީ 5 ލައްކަ ގަހުގެ އަމާޒަށް ވާސިލުވުމަށް ކުރެވޭ މަސައްކަތެކެވެ.
ފާހަގަކޮށްލެވޭ ކަމަކީ، "5 އަހަރުން 5 މިލިއަން ގަސް" ޕްރޮގްރާމް ރައީސް މުޢިއްޒު އިޢުލާންކުރެއްވީ ނިމިދިޔަ އަހަރުގެ ޑިސެންބަރު މަހު އޮތް "ކޮޕް28″ ގައެވެ. މި ޕްރޮގްރާމް މާލެ އާއި ރާއްޖޭގެ ހުރިހާ އަތޮޅެއްގައި ކުރިއަށް ގެންދިއުމަށް ހަމަޖެހިފައިވާ ކަމެވެ.
