ޕްރޮސިކިއުޓަ ޖެނެރަލް (ޕީޖީ) ގެ މަގާމަށް ބޭފުޅަކު އައްޔަންކުރަން ބުދަ ދުވަހުގެ ރޭ ދައުރުން ބޭރުގައި ރައްޔިތުންގެ މަޖިލީހުގެ ޖަލްސާއެއް ބާއްވަން ތާވަލުކޮށްފި އެވެ.
ޕީޖީގެ މަގާމު ހުސްވެފައި ވަނީ އެ މަގާމުގައި ހުންނެވި ހުސައިން ޝަމީމް ވަކިކުރަން މަސައްކަތް ކުރުމުން އެ މަގާމުން އިސްތިއުފާ ދެއްވުމާ ގުޅިގެންނެވެ. އިސްތިއުފާ ދެއްވި ނަމަވެސް، އޭނާ މަގާމުން ވަކިކުރަން މިދިޔަ މަހުގެ 22 ވަނަ ދުވަހުގެ ރޭ ޖަލްސާއެއް ބާއްވައި ވޯޓު ނަގައި ވަނީ ފާސްކޮށްފަ އެވެ.
ޝަމީމު ވަކިކޮށްފައި ވަނީ މަޖިލިހުގެ ފުރަތަމަ ދައުރުގެ ފަހު ޖަލްސާގަ އެވެ. އެ ޖަލްސާގައި މަޖިލިހުގެ ނައިބު ރައީސް، އަހުމަދު ނާޒިމް ވިދާޅުވި ގޮތުގައި އާ ޕީޖީއަކު އައްޔަންކުރަން ދައުރުން ބޭރުގައި ދެ ޖަލްސާ ބާއްވަން ޖެހޭނެ ކަމުގަ އެވެ.
ރައީސް އޮފީހުން ވަނީ ޕީޖީގެ މަގާމަށް ކުރިމަތިލުމަށް ހުޅުވައިލައިފައެވެ. ސެޕްޓެމްބަރު 11 ގެ ކުރިން އެކަމަަށް އެދި ކުރިމަތިލުމަށް ހުޅުވާލައިފައި ވެއެވެ.
ޕީޖީ ކަމަށް ކުރިމަތިލައްވާ ބޭފުޅުންގެ ނަންތައް ރައީސް ތަރުތީބުކުރެއްވުމަށް ފަހު މަޖިލީހަށް ފޮނުއްވުމުން، މަގާމަށް ބޭފުޅަކު ރައީސް ކުރާއްވާނީ މަޖިލީހުން ރުހުން ދިނުމުންނެވެ.
އެހެންނަމަވެސް ޕީޖީގެ މަގާމަށް ބޭފުޅަކު އައްޔަންކުރަން ބޭފުޅެއްގެ ނަން މިހާތަނަށް ރައީސް ޑރ. މުހައްމަދު މުއިއްޒު ފޮނުއްވާފައެއް ނުވެ އެވެ.
