ނޭވާލާ ނިޒާމަށް އަސަރުކުރާ ވައިރަހެއް ކަމަށްވާ ރެސްޕިރޭޓަރީ ސިންސިޓިއަލް ވައިރަސް (އާރުއެސްވީ) ކުޑަކުދިންގެ މެދުގައި އިތުރުވަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން ބުނީ އާރުއެސްވީ ކުޑަކުދިންގެ ތެރޭގައި އިތުރުވާތީ އެކަން ވަރަށް ގާތުން ބަލަމުން އަންނަ ކަމަށެވެ.
އާރުއެސްވީ އަކީ ގައިން ގަޔަށް އަރާ ވައިރަހެކެވެ. ވައިރަސް ފެތުރެނީ އާންމުކޮށް ކެއްސުމާއި ކިނބިހި އެޅުމުގެ ތެރޭގަ އެވެ. ބަލީގެ އަލާމާތްތަކުގެ ތެރޭގައި ރޯގާ އާއި ކެއްސުމާއި ނޭވާލާން އުނދަގޫވުމާއި ބުރަކަށީގައި ރިއްސުން ފަދަ ކަންކަން ހިމެނެ އެވެ.
އެހެންވެ މިއިން އެއްވެސް އަލާމާތްތައް ފެނިއްޖެ ނަމަ ވީހާ ވެސް އަވަހަކަށް ޑޮކްޓަރަށް ދައްކަން އެޗްޕީއޭ އިން އިރުޝާދު ދީފައިވެ އެވެ.
ބަލި ފެތުރު ނުދިނުމަށް ކުރެވިދާނެ ކަންކަމުގެ ތެރޭގައި މީހުން އެއްވެ އުޅޭ ތަންތަނަށް ނުދިޔުމާއި ގިނަގިނައިން އަތްދޮވުން ހިމެނެ އެވެ.
