ޔުނައިޓެޑް ނޭޝަންސް (ޔޫއެން) ގެ ތަމްރީނު ޕްރޮގްރާމެއްގައި ބައިވެރިވެ ޝާހިދު ވާހަކަ ދައްކަވައިފިއެވެ.
ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ފަބްލިކް ޑިޕްލޮމަސީއާއި ގުޅިގެން ޔޫއެންއިން ކުރިއަށް ގެންދިޔަ ތަމްރީނު ޕްރޮގްރަމްގައި ވާހަކަދެއްކުމުގެ ފުރުސަތު ލިބުމަކީ ޝަރަފެކެވެ.
ޝާހިދު ވިދާޅުވީ، އެ ކޯހުގެ ބައިވެރިންނަށް އދގެ އާންމު މަޖިލީހުގެ ރައީސްކަން އޭނާ ކުރެއްވި އިރުގެ ތަޖުރިބާތައް ހިއްސާކުރެއްވި ކަމަށާއި ބައިނަލްއަގްވާމީ މައިދާނުގައި ޑިޕްލަމަސީއާއި ގުޅޭގޮތުން މައުލޫމާތު ކިޔައިދެއްވި ކަމަށެވެ.
ކޯހުގެ ބައިވެރިންނާއިއެކު ބޭއްވި އެ ބަައްދަލުވުމުން ދުނިޔޭގައި ކުރިއަށް ނިކުތުމަށް އަޒުމު ކަނޑައަޅާފައިވާ ލީޑަރުންނާއި މެދު އުންމީދު އާ ވެއްޖެ ކަމަށް ވެސް ޝާހިދު ވިދާޅުވިއެވެ.
ޝާހިދު ވަނީ މިދިޔަ ސަރުކާރުގައި ރާއްޖޭގެ ފޮރިން މިނިސްޓަރުކަން ކުރައްވާފައެވެ. އަދި އދ.ގެ އާންމު މަޖިލީހުގެ ރައީސްކަން ވެސް ކުރައްވާފައިވެއެވެ. އެ މަގާމުތަކުގައި ހުންނަވައިގެން ބައިނަލްއަގްވާމީ މައިދާނުގައި ރާއްޖެ ތަމްސީލްކުރުމުގެ ގިނަ މަސައްކަތެއް ކުރެއްވެވިއެވެ. އަދި ބައިނަލްއަގްވާމީ މައުދާނުގައި ގުޅުންތައް ބަދަހި ކުރުމުގައި ގިނަ މަސައްކަތްތަކެއް ވެސް ކުރެއްވެވިއެވެ.
