މާދަމާ މާލޭގެ ގިނަ ސަރަހައްދުތަކަކުން ވަގުތީގޮތުން ކަރަންޓު ކެނޑިދާނެކަމަށް އަންގައި، ސްޓެލްކޯއިން ރައްޔިތުންގެ ސަމާލުކަމަށް ގެނެސްފިއެވެ.
މި ކަރަންޓު ކެނޑުމަކީ މާލޭގެ މީޑިއަމް ވޯލްޓޭޖް ޑިސްޓްރިބިއުޝަން ގްރިޑް ނެޓްވޯކްގެ ޤާބިލުކަން އިތުރުކުރުމަށްޓަކައި ކުރަންޖެހޭ މުހިންމު މަސައްކަތެއްގެ ސަބަބުން ކަމަށް ސްޓެލްކޯއިން ބުނެފައިވެއެވެ.
ކަރަންޓު ކެނޑޭނެކަމަށް ލަފާކުރެވެނީ ހެނދުނު 6:00 އިން 6:30 އަށް އަދި 9:45 އިން 10:15 އާ ދެމެދުގައެވެ.
މި ވަގުތުތަކުގައި ހެންވޭރު އަވަށް ފިޔަވައި މާލޭގެ އެހެން ހުރިހާ އަވަށްތަކުން ކަރަންޓު ކެނޑިދާނެ ކަމަށް ސްޓެލްކޯއިން ވަނީ އިންޒާރު ދީފައެވެ. މި މަސައްކަތަކީ މާލެ ސަރަހައްދުގެ ކަރަންޓުގެ ޚިދުމަތް ރަނގަޅުކުރުމަށްޓަކައި، ހުޅުމާލޭގައި ހުންނަ ގްރޭޓަރ މާލެ އިންޓަރކަނެކްޝަން ގްރިޑާ ގުޅާލުމުގެ މަސައްކަތުގެ ބައެކެވެ.
ސްޓެލްކޯއިން ވަނީ މި މަސައްކަތުގެ ސަބަބުން ދިމާވެދާނެ ދަތިތަކަށް މަޢާފަށް އެދިފައެވެ.
