ހުޅުމާލެ ދެވަނަ ފިޔަވަހީގެ މޫދުގައި، މަރައިލުމަށްފަހު ފޮއްޓަކަށް ލައި އެއްލާލާފައި އޮއްވާ ފެނުނު އުމުރުން 13 އަހަރުގެ ކުއްޖާގެ މަރުގެ މައްސަލައިގައި ހައްޔަރު ކުރި ދެ މީހުންނަށް ޖިންސީ ގޯނާގެ ތުހުމަތު ކުރާކަން ހާމަވެއްޖެ އެވެ.
ގދ. މަޑަވެއްޔަށް ނިސްބަތްވާ ރާއިފް ނަމަކަށް ކިޔާ ކުއްޖާ މަރާލާފައި އޮއްވާ ފެނުނީ އެކުއްޖާ ރަހީނުކޮށްގެން އުޅޭތާ 3 ދުވަސް ފަހުންނެވެ. ފުލުހުންނަށް އެކަމުގެ ރިޕޯޓު އާދިއްތަ ދުވަހު ލިބި ދިޔައީ ކުއްޖާ ހޯދުމުގެ މަސައްކަތް ކުރަމުންނެވެ. ހޯދަމުން ދަނިކޮށް ކުއްޖާ ފެނުނީ ހޯމަ ދުވަހުގެ ރޭ ދަންވަރު 2:30 ހާއިރު އެވެ.
މިމައްސަލައިގައި ހޯމަ ދުވަހުގެ ރޭ ދަންވަރު ފުލުހުން ވަނީ ދެ މީހަކު ހައްޔަރު ކޮށްފަ އެވެ. އޭގެ ތެރެއިން އެކަކީ 17 އަހަރުގެ ކުޑަ ކުއްޖެއް ކަމުން އޭނާގެ ތަފްސީލު ހާމައެއް ނުކުރެ އެވެ. ދެވަނަ މީހާ އަކީ ނ. ލަންދޫ ބަގީޗާގޭ އުމުރުން 27 އަހަރުގެ އިބްރާހިމް ޒިހާން އެވެ.
މި ދެ މީހުން ހައްޔަރުކޮށް ޝަރީއަތް ނިމެންދެން ޒިހާން ބަންދު ކުރަން ކޯޓުން ވަނީ އަމުރު ކޮށްފަ އެވެ. އޭނާގެ މައްޗަށް ކުރަނީ ގަސްތުގައި މީހަކު މެރުމުގެ ކުށުގެ ތުހުމަތުގެ އިތުރުން މާރާމާރީ ހިންގުމާއި ރަހީނު ކުރުން އަދި ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތުކަން ވަނީ އެނގިފަ އެވެ.
ހައްޔަރު ކުރި 17 އަހަރުގެ ކުއްޖާގެ މައްޗަށް ކުރާ ތުހުމަތުތަށް ކަށަވަރުވެފައެއް ނުވެ އެވެ. އެހެންނަމަވެސް ޒިހާންއަށް ކުރާ ތުހުމަތުތައް އެކުއްޖާއަށްވެސް ކުރާ ކަމަށް ވަނީ އެނގިފަ އެވެ.
ފުލުހުން މި ދެ މީހުން ހައްޔަރު ކުރީ މާލޭގައި ހުންނަ ގެސްޓު ހައުސް އަކުންނެވެ. އެނގިފައިވާ ގޮތުގައި ކުލަ ހެދުމުގައި ތިބި ފުލުހުން އެ ގެސްޓު ހައުސްއަށް ދިޔައީ ހޯމަ ދުވަހުގެ ރޭ 8 ޖަހާކަށް ހާއިރު އެވެ. އޭގެ ފަހުން އެމީހުން ތިބި ރޫމަށް ވަންނަން ޖެހުނީ ދޮރު ފަޅާލައިގެންނެވެ. ވަރަށް ގިނައިރު އެ ރޫމުގައި ތިބުމަށްފަހު ދެ މީހުން ހައްޔަރުކޮށްގެން ގެންދިޔައީ އެރޭގެ ދަންވަރު 3 ވެސް ޖެހި ފަހުންނެވެ.
މައުލޫމާތު ލިބޭ ގޮތުގައި ހައްޔަރު ކުރި ދެމީހުން އެ ގެސްޓު ހައުސްއަށް ދިޔައީ އާދިއްތަ ދުވަހު އެވެ. އަދި އޭގެ ފަހުން ދެދުވަސް ވީއިރުވެސް އެ ކޮޓަރިން ނުނިކުންނަކަންވެސް ވަނީ އެނގިފަ އެވެ.
