ދިވެހިރާއްޖެއިން ސައުދީ އަރަބިއްޔާއަށް ކަނޑައަޅާ ސަފީރުގެ މަގާމަށް އަހުމަދު ސަރީރު އައްޔަނު ކުރުމަށް ރައްޔިތުންގެ މަޖިލީހުން ރުހުން ދީފި އެވެ.
ސައުދީ ސަފީރު ކަމަށް ސަރީރު އައްޔަނު ކުރުމަށް މަޖިލީހުން ފާސްކޮށްފައިވަނީ ވޯޓުގައި ބައިވެރިވި 86 މެންބަރުންގެ އިއްތިފާގުންނެވެ.
ސަރީރު މި ވަގުތު ހުންނެވީ ފޮރިން މިނިސްޓްރީގެ އެމްބެސެޑަރ އެޓް ލާޖުގެ މަގާމުގަ އެވެ. އޭގެ ކުރިން އޭނަ އޮގަނައިޒޭޝަން އިފް އިސްލާމިކް ކޮންފަރެންސް އޯއައިސީ) ގެ ޑިރެކްޓަ އޮފް އޭޝިއަން އެފެއާޒްގެ މަގާމު ވެސް ފުރިއްވި އެވެ. ސަރީރަކީ 1986 ވަނަ އަހަރުން ފެށިގެން ފޮރިން މިނިސްޓްރީގެ އެކި މަގާމުތަކުގަޔާއި، ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަޤާމުތަކުގައި އަގުހުރި ޚިދުމަތްތަކެއް ކުރައްވަމުންގެންދަވާ ބޭފުޅެކެވެ.
އެގޮތުން ފޮރިން މިނިސްޓްރީގެ ފޮރިން ސެކްރެޓަރީގެ މަގާމާއި، އދ. އަށް ރާއްޖެއިން ކަނޑައަޅުއްވާފައި ހުންނަވާ ޕާމަނަންޓް ރެޕްރެޒެންޓެޓިވްގެ މަގާމާއި، އެމެރިކާ އަށް ރާއްޖެއިން ކަނޑައެޅުއްވި ސަފީރުގެ މަގާމު ވެސް ފުރުއްވާފައިވެ އެވެ. އަދި ބަންގްލަދޭޝްގެ ސަފީރުކަމާއި އދ. ގައި ހުންނަވާ ރާއްޖޭގެ ދާއިމީ މަންދޫބުކަމުގެ މަގާމު ވެސް ސަރީރު ފުރުއްވި އެވެ.
