މިއަހަރުގެ މިސް ޔުނިވާސް މުބާރާތުގައި ފުރަތަމަ ފަހަރަށް ދިވެއްސެއްގެ ގޮތުގައި 21 އަހަރުގެ މޮޑެލް، މަރިޔަމް ޝައިނާ ނަސީމް ބައިވެރިވުމާ ގުޅިގެން ސަރުކާރުގެ ފަރާތުން ޔޫތު މިނިސްޓްރީން ނެރުއްވި ބަޔާނެއްގައި ވަނީ މިފަދަ ހަރަކާތްތަކަކީ ދިވެހިންގެ ދީނާއި، އަޤީދާއާއި، ސަގާފަތާ ނުގުޅޭ ކަންކަން ކަމަށާއި، އަދި އާންމު އަޚްލާޤީ މިންގަނޑުތަކާ ޚިލާފު ކަމެއްކަމަށް ބަޔާން ކޮށްފިއެވެ. އަދި މި ކަމުގައި ދިވެއްސަކު ބައިވެރިވުން ސަރުކާރުން ކުށްވެރިކުރާ ކަމަށާއި، އެކަން ހުއްޓާލުމަށްވެސް މި ބަޔާނުގައި ގޮވާލާފައި ވެއެވެ.
އަދި އެފަދަ ކަންކަމަކީ ދިވެހިން ގަބޫލުކުރާ އާއްމު އަހުލާގީ މިންގަނޑުތަކާއި އުސޫލުތަކާއި ވެސް ހިލާފު ކަންކަމަށްވާއިރު ރާއްޖެ ތަމްސީލު ކުރުމުގައި ދިވެއްސަކު އެފަދަ ހަރަކާތްތަކަށް ދިއުން ދިވެހި ސަރުކާރުން ކުށްވެރި ކުރަމެވެ.
ބަޔާނުގައިވެއެވެ.
އެހެންނަމަވެސް ސަރުކާރުގެ މި ބަޔާނާއި ގުޅިގެން ސޯޝަލް މީޑިއާގައި ފާޑުކިޔާ ބައެއް ފަރާތްތަކުން ވަނީ، އައުރަ ނިވާނުކޮށް ބޮޑީ ބިލްޑިންގ މުބާރާތްތަކުގައި ފިރިހެނުން ބައިވެރިވުމާއި، އެފަދަ މުބާރާތްތައް ރާއްޖޭގައި ބޭއްވުމާއި، ރާއްޖެ ތަމްސީލުކުރުން އެއީ ސަރުކާރަށް މައްސަލައަކަށް ނުވާ ކަމެއްތޯ ސުވާލު އުފައްދާފައެވެ.
މި މައްސަލައާ ގުޅިގެން ރައީސް މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މާތްﷲ ރުހިވޮޑިނުގަންނަވާ ގޮތަށް ހަށިގަނޑު ހާމަކޮށްގެން ކުރާ އެއްވެސް މަސައްކަތަކުން ނުވަތަ ކުޅިވަރަކުން، އެއީ ފިރިހެނަކު ނުވަތަ އަންހެނަކު ކަމުގައި ވިޔަސް، އެމީހަކަށް ނުވަތަ އެމީހެއްގެ ދީނާއި ޤައުމަށް ހަޤީޤީ ރީތި ނަމެއް، އުފަލެއް އަދި ކާމިޔާބީއެއް ވެސް ނުލިބޭނެ ކަމަށެވެ.
މިކަމާއި ގުޅޭގޮތުން ރައީސް މުއިއްޒު ވަނީ ކީރި ގުރުއާންގެ އާޔަތެއްވެސް އެމަނިކުފާނުގެ އެކްސް ޕޯޓުގައި ގެންނަވާފައެވެ.
އެ އާޔަތުގެ މާނައަކީ: "އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާޠިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާޠިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ."
ރީތީގެ މުބާރާތްތަކުގައި ދިވެހި ބައިވެރިވުން ސަރުކާރުން ކުއްވެރި ކޮށްފައިވާއިރު، މެކްސިކޯގައި ބޭއްވުމަށް ހަމަޖެހިފައިވާ ބައިނަލްއަގުވާމީ ރީތީގެ މުބާރާތިގައި ރާއްޖޭގެ ފަރާތުން ބައިވެރިވުމަށް ދިވެހި އަންހެންކުއްޖަކު ވަނީ ނިންމާފައެވެ.
