އަމިއްލަ ރަށުގައި ތިބެގެން ޓީޗިން ދާއިރާއިން ތައުލީމާއި ތަމްރީނު ހާސިލުކުރެވޭ ގޮތަށް ފަރުމާކޮށްފަައިވާ ޓީޗަރުން ތަމްރީނުކުރުމުގެ ގައުމީ ޕްރޮގުރާމު ފަށައިފި އެވެ.
މި ޕްރޮގްރާމް މިއަދު ފައްޓަވައި ދެއްވީ ގައުމީ ޔުނިވަސިޓީގައި ބޭއްވި ރަސްމިއްޔާތެއްގައި ރައީސް ޑރ. މުޙައްމަދު މުޢިއްޒެވެ.
އެ ރަސްމިއްޔާތުގައި އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢުގެ އިތުރުން ކެބިނެޓްގެ ވަޒީރުންނާއި، ދައުލަތުގެ އިސްވެރީން ބައިވެރިވެ ވަޑައިގެންނެވިއެ ވެ.
ޓީޗަރުން ތަމްރީނުކުރުމުގެ ގައުމީ ޕްރޮގްރާމްގައި މިއަހަރު ބައިވެރިވީ 135 މީހުންނެވެ. އެ މީހުންނަށް ވަނީ ސްކޮލަޝިޕްގެ ލިޔުން ޙަވާލުކޮށްފަ އެވެ. ޕްރޮގްރާމްގެ ކޮންމެ ބައިވެރިޔަކަށް މަހަކު 1،500ރ. ގެ ސްޓައިޕެންޑެއް ވެސް ދޭނެ އެވެ.
މިއީ ރާއްޖޭގެ ސްކޫލްތަކަށް ދިމާވެފައިވާ ރާއްޖޭގެ ޓީޗަރުންގެ ދަތިކަން ހައްލުކުރަން ސަރުކާރު ފެށި ޕްރޮގްރާމެކެވެ.
އެޑިއުކޭޝަން މިނިސްޓްރީން ބުނީ ރައީސްގެ ލަފާފުޅާ އެއްގޮތަށް ޕްރޮގްރާމް ފަރުމާކޮށްފައި ވަނީ ގްރޭޑް 11 ގައި އޭ ލެވެލް އަށް ކިޔަވަންފަށާ ދަރިވަރުންގެ ތެރެއިން މުދައްރިސަކަށްވުމަށް ޝައުގުވެރިވާ ދަރިވަރުން އޭ ލެވެލްގެ ކިޔެވުމާއެކު، ޓީޗިން ފައުންޑޭޝަން ނިންމުމަށް ފަހު ޓީޗިން ޑިގްރީ ޕްރޮގްރާމް ފަށާ ގޮތަށް ކަމަށެވެ.
ޕްރޮގްރާމްގެ ދަށުން ދަރިވަރުން ތަމްރީނުކުރުމަށް ހަމަޖެހިފައި ވަނީ ދިވެހި ޓީޗަރުން ލިބުން އެންމެ ދަތިވާ މާއްދާތަކާއި، ރަށްތައް ފާހަގަކޮށް، އެ ކަންކަމަށް ޚާއްޞަ އިސްކަމެއް ދީގެންނެވެ. ޕްރޮގްރާމް ކުރިއަށް ގެންދަން ނިންމާފައި ވަނީ ގްލޯބަލް ޕާޓްނަޝިޕް ފޮ އެޑިޔުކޭޝަންގެ މާލީ އެހީއާއެކު މިނިސްޓްރީގައި ގާއިމުކުރެވިފައިވާ، ތަޢުލީމަށް އިންޤިލާބީ ބަދަލު (ތައިބަ) ގެ ޕްރޮޖެކްޓްގެ ދަށުންނެވެ.
މިނިސްޓަރު ޝަފީއު ވިދާޅުވީ ޕްރައިމަރީ ގުރޭޑުތަކަށް މިހާރުން މިހާރު ވެސް 250 ވަރަކަށް ޓީޗަރުން ބޭނުންވާ ކަމަށެވެ. އެގޮތުން
އިނގިރޭސި އާއި ހިސާބާއި ސައިންސް މާއްދާތައް ކިޔަވައި ދިނުމަށް ބޭނުންވާ ޓީޗަރުން އެކަށީގެންވާ އަދަދަށް ނެތްކަން ފާހަގަކުރެއްވައި މިނިސްޓަރު ވިދާޅުވީ ސައިންސްގެ މާއްދާތަކުން ދަސްވެނިވާ ދަރިވަރުން މަދު ކަމަށެވެ. އަދި ސައިންސްގެ މާއްދާތަކުން ދަރިވަރުންގެ ނަތީޖާތައް ވެސް ދަށް ކަމަށް މިނިސްޓަރު ވިދާޅުވި އެވެ.
އެހެންވެ ޔުނިސެފާއި ގްލޯބަލް ފަންޑިންގެ އެހީތެރިކަމާއެކު ޓީޗަރުން ބިނާކުރާ އިތި، ޓީޗިން ޕްރޮގުރާމުގައި 21 ވަރަކަށް ރަށަކުން 130 އަށްވުރެ ގިނަ ދަރިވަރުން ބައިވެރިވެ އެވެ.
މިނިސްޓަރު ވިދާޅިވީ އަދި މަތީ ތައުލީމުގެ ފުރުސަތުތައް ރަށުގައި ތިބެގެން ހާސިލުކުރެވޭނެ ގޮތްތައް އިންތިޒާމުކުރުމަށް ގިނަ ބަޔަކު އެދޭތީ މި ޕްރޮގުރާމުގެ ވީހާ ވެސް ގިނަ މާއްދާތަކެއް ރަށުގައި ތިބެގެން ކިޔެވޭ ގޮތަށް އިންތިޒާމުކުރުމަށް ސަރުކާރުން މަސައްކަތްކުރަމުން އަންނަ ކަމަށެވެ.
މިނިސްޓަރު އިތުރަށް ވިދާޅުވީ އެ ޕްރޮގުރާމަށް ދަރިވަރުންގެ ކިބައިން ލިބޭ ތަރުހީބު އިތުރުވަމުންދާ ކަމަށެވެ. އެގޮތުން މި އަހަރު 130 އެއްހާ ދަރިވަރުން ބައިވެރިވި ނަމަވެސް އަންނަ އަހަރު އެ އަދަދު 150 އަށް އިތުރުވާނެ ކަމަށް ގަބޫލު ކުރައްވާ ކަމަށެވެ.
މި ޕްރޮގުރާމު ހިންގަނީ ގައުމީ ޔުނިވާސިޓީ އާއި އިސްލާމިކް ޔުނިވަސިޓީ އާއި ވިލާ ކޮލެޖާ ގުޅިގެންނެވެ.
