ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ދާއިރާތަކުގެ އިންތިހާބުގެ މައްސަލަ ބޮޑުވެ ކެންޑިޑޭޓުންގެ ލިސްޓް އަލުން މުރާޖާކުރަން ނިންމައިފި އެވެ.
ޕީއެންސީގެ އެތެރޭގެ އިންތިހާބުގެ މައްސަލަ ބޮޑުވެފައި ވަނިކޮށް އެ ޕާޓީން ނެރުނު ބަޔާނެއްގައި ބުނީ ދާއިރާތަކުގެ އިންތިހާބުގައި ވާދަކުރަން ހުށަހެޅި ކެންޑިޑޭޓުންގެ ޝަރުތު ފުރިހަމަވާ ގޮތް ކަނޑައެޅިއިރު އިދާރީ މައްސަލަތަކެއް ހުރިކަން ފާހަގަވާ ކަމަށެވެ.
ޕީއެންސީ އިން ބުނީ އެ ލިސްޓް މުރާޖައާ ކުރަމުންދާ ކަމަށާއި ޝަރުތު ފުރިހަމަވާ ކެންޑިޑޭޓުންގެ ފުރިހަމަ ލިސްޓް ކުރިއަށް އޮތް ހޮނިހިރު ދުވަހު އާންމު ކުރާނެ ކަމަށެވެ.
ޕީއެންސީ އިން ބުނާ ގޮތުގައި އެ ޕާޓީގެ އެތެރޭގެ އިންތިހާބުގައި 2،095 މަގާމަކަށް މީހުން ހޮވާނެ އެވެ.
އިންތިހާބު ކުރާ ދާއިރާތައް ކަނޑައަޅާފައިވަނީ ރައްޔިތުންގެ މަޖިލީހުގައި ދާއިރާތައް ހިމެނޭ ގޮތަށް ބަލައިގެންނެވެ. އެއްވެސް ދާއިރާއެއްގައި ޕީއެންސީއަށް ނިސްބަތްވާ މަޖިލިސް މެމްބަރަކު ހުންނެވި ނަމަ އެ ދާއިރާގެ ރައީސްގެ މަގާމު އެ ބޭފުޅަކަށް އިންތިހާބަކާ ނުލައި ލިބޭނެ އެވެ.
ޕީއެންސީގެ ދާއިރާއެއްގެ ރައީސް ކަމަށް ކުރިމަތިލެވެނީ އެ ޕާޓީއަށް އަލަށް 50 މެންބަރުން ހޯދައިދީގެންނެވެ. އަދި ނައިބް ރައީސް ކަމަށް ކުރިމަތިލެވެނީ އެ ޕާޓީއަށް އަލަށް 25 މެންބަރުން ހޯދައިދީގެންނެވެ.
