ކުރިއަށް އޮތް ރިޔާސީ އިންތިހާބުގައި ވާދަކުރެއްވުމާ ގުޅޭ ގޮތުން ކުރީގެ ރައީސް އިބްރާހީމް މުހައްމަދު ސޯލިހް ސާފު ޖަވާބެއް ނުދެއްވި އެވެ.
ރައީސް ޑރ. މުހައްމަދު މުއިއްޒުގެ ސަރުކާރަށް މިއަދު އެއް އަހަރު ފުރުމާ ގުޅިގެން ރައީސް ސޯލިހް ވަނީ ރާއްޖެ ޓީވީގެ "ފަށާއިރު" ޕްރޮގްރާމުގައި ބައިވެރިވެވަޑައިގެން މިސަރުކާރާ މެދު އެމަނިކުފާނު ދެކެވަޑައިގަންނަވާ ގޮތާއި އަދި އެމަނިކުފާނުގެ ސިޔާސީ ހަޔާތްޕުޅާ ގުޅޭގޮތުން ވާހަކަދައްކަވާފަ އެވެ.
ރިޔާސީ އިންތިހާބުގައި ވާދަކުރެއްވުމަށް ޝައުގުވެރިކަން އެބަހުރިތޯ ސުވާލުކުރެއްވުމުން ރައީސް ސޯލިހް ވިދާޅުވީ އެމަނިކުފާނުގެ ސިޔާސީ ކުރިމަގު އޮތް ގޮތް އެމްޑީޕީގެ އިސް ބޭފުޅުންނަށާއި އެމަނިކުފާނުގެ އާއިލީ ބޭފުޅުންނަށް "ޝައްކެއް ނެތް މިންވަރަށް" އެނގިވަޑައިގަންނަވާ ކަމަށެވެ.
ރައީސް ސޯލިހް ވިދާޅުވީ އެމްޑީޕީގެ ޓިކެޓްގައި ރިޔާސީ އިންތިހާބުގައި ވާދަކުރުމަށް ޝައުގުވެރިވާ ހަތަރު ފަސް ބޭފުޅަކު އުޅުއްވާ ކަމަށެވެ. ނަމަވެސް އެ ބޭފުޅުންގެ ނަންތައް ހާމަކުރައްވާފައެއް ނުވެ އެވެ.
ރައީސް ސޯލިހް ވިދާޅުވީ ވާދަވެރި ޕްރައިމަރީއެއްގައި ވާދަކުރަން ބަޔަކު ތިބުމަކީ ވަރަށް ރަނގަޅު ކަމެއް ކަމަށެވެ. ސޯލިހު ވިދާޅުވީ އެމްޑީޕީގެ ރިޔާސީ ޕްރައިމަރީއަށް ވާދަކުރުމަށް ޝައުގުވެރިވާ ފަސް ވަރަަކަށް ބޭފުޅުން ތިއްބެވިކަމަށެވެ. އަދި ވާދަވެރި އެތެރޭގެ މަސައްކަތްތައް ކުރުމަކީ ވަރަށް އެދިވަޑައިގަންނަވާ ގޮތެއްކަމަށްވެސް ވިދާޅުވި އެވެ. 2028 އަންނަންދެން އަދި ވަރަށް ގިނަ މަސައްކަތް ކުރަންހުރި ކަމަށްވެސް ވިދާޅުވި އެވެ.
ގައުމު މިއަދު އޮތް ހާލަތުން ކުރިއަށް އޮތް ރިޔާސީ އިންތިހާބުގެ ކުރިންވެސް ވަރަށް ގިނަ މަސައްކަތްތައް ކުރަން ހުރިކަން ފާހަގަކުރައްވަމުން ރައީސް ސޯލިހް ވިދާޅުވީ ރިޔާސީ ޕްރައިމަރީއަށް ޝައުގުވެރިވާ ބޭފުޅުންވެސް ޕާޓީގެ ހިންގުމުގައި ބައިވެރިވުން މުހިއްމު ކަމަށެވެ.
