ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރަން ބިލެއް ހުށަހަޅަން ސަރުކާރުން ނިންމައިފި އެވެ.
މަޢުލޫމާތު ލިބިފައިވާ ގޮތުގައި މަޖިލީހުގެ މެޖޯރިޓީ ޕާޓީ ކަމަށްވާ، ޕީއެންސީން ބޭނުންވަނީ މި ބިލު މާދަމާ މަޖިލީހަށް ހުށަހެޅުމަށެވެ. އަދި ވީއެންމެ އަވަހަކަށް އެ ބިލު ފާސްކުރުމަށް ޕީއެންސީން މަސައްކަތް ކުރާކަމަށްވެސް މައުލޫމާތު ލިބެ އެވެ.
މިފަދަ އިސްލާހެއް ގާނޫނު އަސާސީ އަށް ގެންނަން ނިންމާފައިވާއިރު، މެންބަރުން ޕާޓީ ބަދަލު ކުރުމުން މެމްބަރުކަމުން އިސްތިއުފާ ދޭން ޖެހޭ ގޮތަށް ހަދާފައިވާ އެންޓި ޑިފެކްޝަން ގާނޫނުގެ މާއްދާތަކެއް ބާތިލުކުރަން ހައި ކޯޓަށް ވެސް ވަނީ މައްސަލައެއް ހުށަހަޅާފަ އެވެ.
މުހައްމަދު އަނީސް ނަމަކަށް ކިޔާ އަމިއްލަ ފަރާތަކުން ހައިކޯޓަށް ހުށަހަޅާފައިވާ މައްސަލާގައި އެ ގާނޫނުގެ ބަައެއް މާއްދާތައް ބާތިލުކުރަން އެދުނު ނަމަވެސް ބާތިލުކުރަން އެދުނު މާއްދާތަކަކީ ކޮބައިކަން ހައިކޯޓުން ހާމަނުކުރެ އެވެ.
އެންޓި ޑިފެކްޝަން ބިލު މަޖިލީހަށް ފުރަތަމަ ހުށަހެޅިއިރު 3 ވަނަ މާއްދާގެ އަރިމަތީ ސުރުހީގައި ބަޔާންކޮށްފައިވަނީ، "ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެ ހާލަތްތައް" މިހެންނެވެ. އެހެންނަމަވެސް ކޮމިޓީން ބިލު އިސްލާހުކުރިއިރު މިހާރު ބަޔާންކޮށްފައިވަނީ، "ރައްޔިތުންގެ މަޖިލީހުގެ މެންބަރުކަމުން އިސްތިއުފާ ދޭންޖެހޭ ހާލަތްތައް" ކަމަށެވެ.
މަޖިލީހުން ފާސްކުރި ބިލުގެ 3 ވަނަ މާއްދާގައި ބުނެފައިވަނީ، އެ މާއްދާގައި ބަޔާންކޮށްފައިވާ ހާލަތްތަކުންކުރެ ހާލަތެއް މެދުވެރިވެއްޖެނަމަ، ލަސްވެގެން 7 ދުވަހުގެ ތެރޭގައި އިލެކްޝަންސް ކޮމިޝަނުން އެކަން ރައްޔިތުންގެ މަޖިލީހަށް އަންގަންވާނެ ކަމަށެވެ. އަދި އިސީން އެކަން މަޖިލީހަށް އަންގާ ދުވަހުން ފެށިގެން އެ މީހަކު މެންބަރުކަމުން އިސްތިއުފާ ދޭންވާނެ ކަމަށެވެ.
