ގެދޮރުވެރިޔާ ސްކީމްގެ ދަށުން ހުޅުމާލޭގައި ނިންމުމުގެ މަސައްކަތް ކުރަމުންދާ 4.000 ފްލެޓް ލިބޭ މީހުންގެ ވަގުތީ ލިސްޓްގެ ސައްހަކަން ކަށަވަރުކުރުމަށް ކޫރާ މަސައްކަތަށް ނުފޫޒު ފޯރުވަމުންދާ ކަމަށް ބުނެ ފަތުރަމުންދާ ވާހަކަތައް ދޮގުކޮށްފި އެވެ.
ހައުސިން މިނިސްޓްރީ މިއަދު ނެރުނު ބަޔާނެއްގައި ބުނީ ފްލެޓް ލިސްޓްގެ ސައްހަކަން ކަށަވަރުކުރުމަށް ކުރާ މަސައްކަތްތަކަށް ސިޔާސީ ބޭފުޅުންގެ ނުފޫޒު އޮތް ކަމަށް ބުނެ ދައްކަނީ ދޮގު ވާހަކަތަކެއް ކަމަށެވެ.
"މި ސްކީމާ ގުޅިގެން ކުރިއަށްދާ ރީއިވެއުލޭޝަންގެ މަސައްކަތަށް އެއްވެސް ފަރާތަކުން ނުފޫޒެއް ނުފޯރުވޭނެ ކަމުގެ ފުރިހަމަ ޔަގީންކަން އެންމެހައި ރައްޔިތުންނަށް އަރުވަމެވެ،" މިނިސްޓްރީން ބުންޏެވެ.
ހައުސިން މިނިސްޓްރީން ބުނީ ސަރުކާރުން ބޭނުންވަނީ އެންމެ ހައްގުވެރި މީހުންނަށް ފަހި ދިރިއުޅުން ކޯޕަރޭޝަން (އެފްޑީސީ) އިން އަޅަމުންދާ ފްލެޓްތައް ހަވާލުކުރަން ކަމަށެވެ.
ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގައި ހުޅުމާލޭގެ ދެވަނަ ފިޔަވަހީގައި އިމާރާތް ކުރަން ފެށި 32 ޓަވަރުގެ މަސައްކަތުގެ ބޮޑު ބައެއް މިހާރު ވަނީ ނިންމާފަ އެވެ. މި ޓަވަރުތަކުގައި ހުރި ފްލެޓްތަކަށް ކުރިމަތިލުމަށް ރައީސް ސޯލިހްގެ ވެރިކަމުގައި ހުޅުވާލުމުން 20،697 އެޕްލިކޭޝަން ފޯމު ހުށަހެޅި އެވެ. މީގެތެރެއިން 18،167 މީހުން ފްލެޓަށް ޝަރުތު ހަމަވާ ކަމަށްވެސް ރައީސް ސޯލިހްގެ ވެރިކަމުގައި އޮތީ ކަނޑައަޅާފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވެރިކަމާ ހަވާލުވެ ފްލެޓަށް ކުރިމަތިލި ފޯމުތައް އަލުން މުރާޖައާ ކުރަން ފެށުމަށްފަހު ފްލެޓް ލިސްޓް އަލުން އިއުލާން ކުރަނީ ކަމަށް ބުނެ އެތައް ތާރީހެއް ދިނެވެ. ނަމަވެސް އެއިން އެއްވެސް ތާރީހަކަށް ފްލެޓް ލިސްޓުން އަލުން ނެރެވޭ ގޮތް ނުވުމުން ހައުސިން މިނިސްޓްރީން އެންމެ ފަހުން ބުނީ އެ ލިސްޓް މުރާޖައާކޮށް ނިންމުމަށް އަދިވެސް އިތުރު ވަގުތު ބޭނުންވާތީ އެ މަސައްކަތް ނިމުމުން ފްލެޓް ލިސްޓް ނެރޭނެ ކަމަށެވެ.
